向太陳嵐今晚同老公向華強，及兒子向佐到金鐘港麗酒店出席拍賣會，本來影完想走，但都好合作應傳媒要求停低做訪問。問佢有冇關心過卓林？向太話：「唏，呢啲人家 ...
向太陳嵐今晚同老公向華強，及兒子向佐到金鐘港麗酒店出席拍賣會，本來影完想走，但都好合作應傳媒要求停低做訪問。問佢有冇關心過卓林？向太話：「唏，呢啲人家嘅家事，我哋點講呢？」你覺得成龍作為爹哋係咪應該要負責任？向太就表示：「唔可以話佢唔負責任，如果有人夾硬要生卓林出嚟，卓林先係最無辜無可憐，佢冇得選擇，係佢阿媽選擇嘅，成龍都係一個兩難嘅情況囉！」之前翁靜晶於記招上，指吳綺莉於2015年遇財困，俾卓林報警控家暴之外，又收電台大信封，還需應付卓林間國際學校每月萬七蚊學費，仲有其他生活費，已山窮水盡。當時翁代友人搵中間人向成龍求助，對方就表明「一毫子」都唔使旨意俾。問向太可知吳綺莉是否有財困？佢話：「唔知道佢哋有冇財困問題。」但成龍揚言一毫子都唔會俾，向太即反問；「點俾呢？將來卓林大個，21歲喇，我相信佢(成龍)會照顧佢，會畀錢卓林。但係唔會交畀吳綺莉。」問到有冇同卓林溝通過？向太就稱：「冇得溝通，因為我唔識佢。」未完，向太繼續力撐成龍，話：「成龍係個有情有義嘅人，佢表面上會咁做(即表面上對兩母女不聞不問)，但係你又唔知道佢私底下為咗呢件事喊咗好多次。」嘩!向太再稱：「佢(成龍)始終有家庭，佢做做錯事，老婆又咁撐佢。」咁你有冇私下搵成龍安慰下咁？「我同佢見親都係一大班人，不過有時知佢同啲好朋友傾啲好深入嘅偈，大家都唔知點樣做。」
