(新增內容)吳綺莉噚日在翁靜晶同梁耀忠議員陪同下，控訴成龍多年來冇俾過一分一毫供養女兒卓林，記者會上淚灑人前。(相關文章﹕http://bit.ly/ ...
(新增內容)吳綺莉噚日在翁靜晶同梁耀忠議員陪同下，控訴成龍多年來冇俾過一分一毫供養女兒卓林，記者會上淚灑人前。(相關文章﹕http://bit.ly/2nmWj7b )成龍似乎無理會指控，今日繼續出席鳳凰衛視《影響世界華人盛典》，並獲大會頒發特別致敬大獎。成龍雖然冇行紅地毯，但佢有參予整個過程，由頭坐到尾，攞完獎都有接受大會指定傳媒訪問，至於其他傳媒呢，成龍就未有理會，匆匆離開。至於俾網民封做「燈神」嘅蕭若元，今日拍片暫時唔講政事，而係講吓呢單家庭糾紛。
蕭生話睇完記者會後覺得非常憤怒，話成龍早前爆自己有十億身家，已經寫好遺囑，一半留俾林鳳嬌同房祖名，一半就要用嚟做慈善基金，救中國老虎，但蕭生就質疑現存嘅中國老虎，包括華南虎同東北虎，前者已近乎絕種，基本上近乎冇可能保育到，而後者喺其他國家已保育得好好，根本唔需要佢幫，反而最需要幫嘅係吳綺莉兩母女，但成龍竟然一個毫子都冇俾過，蕭生都好唔留情俾咁鬧爆話﹕「成龍仲話得到大獎(指奧斯卡榮譽獎，近年稱奧斯卡終身成就獎），咩善事乜乜乜乜咁，我睇見吳綺莉對佢嘅控訴，我真係覺得呢條友係人渣之友嚟！」蕭生覺得吳綺莉有情緒病同酗酒習慣，需要向醫生求助，蕭生仲話﹕「講咩善事，自己個女，成龍你60幾歲人，大家知就有個房祖名，即係唔會再有女啦。一世人得一個女，而你話斗零都唔俾佢，呢個係人渣之友。」而吳綺莉好友「大姐明」林建明亦有轉載蕭若元呢條片。
