談到與雙親關係，大劉劉鑾雄坦言，跟母親劉葉淑婉感情較好，因為與父親同是性格火爆，易生磨擦。他說：「我同媽咪感情好好多，因為爹哋雖然錫我，但佢又炮仗頸，我又炮仗頸，好易初則口角，繼而動武，哈哈！但我阿媽就好縱我，可能我係佢第一個仔，加上我又係老竇當時第一個仔，因為佢以前喺大陸有幾個仔，但日本仔打仗時餓死晒，我就係佢當時唯一親生仔。」劉媽媽溺愛兒子大劉到甚麼程度呢？前文提過劉老太在大劉到外地留學期間，定時給生活費，大劉也不諱言：「阿媽錫我同縱我，錢好鬆動。」(文章連結: http://bit.ly/2ngVqNq )大劉指自己愛追求最靚的東西，當年幾萬元可以買一幢樓（係一幢，不是一層！）外國留學時，他看中很貴的靚車、名表，劉母會照送給他。大劉憶述：「以前住喺西營盤德輔道西時，雖然環境唔係好好，但縱嘅程度都唔錯，十歲之後搬咗去跑馬地，環境好咗啲，都係縱，但唔係咁犀利。「但到我去英國、加拿大讀書，好明顯縱得好犀利，譬如18歲入大學第一年，我好鍾意玩Hi-Fi聽音樂，我要求佢買一套Hi-Fi係全世界最靚，嗰時價值可以買到一層豪宅，佢都買畀我，所以，有時諗番轉頭覺得好內疚，唔應該咁做，因為我追求靚嘅嘢，聽音樂鍾意好嘅聲，乜都要最靚。」大劉母親誕下三女兩子，大劉有一個姊姊、一個弟弟和兩個妹妹。眾多子女中，劉母與大劉感情最好，而劉母待人處事態度，亦深深影響了大劉：「佢成日教我做人，第一，要畀心機讀書，第時出嚟做嘢唔使咁辛苦；第二，做人最緊要講信用，應承咗人一定要做到，唔好諗住自己承擔唔到，吹吓水應承咗，事後唔承諾，所以我細細個學識講信用，出嚟做生意好緊要。有信用，就算水緊，人哋都會信你、借錢俾你幫你，但冇信用，就算有錢，人哋都唔想同你有來往或生意來往。」
統籌、採訪：陳月媚
攝影：陳俊強
攝錄：NEO、馮嘉銘、吉吉【劉鑾雄講大劉（1）】
獨家 千億富豪劉鑾雄 24歲問家傭借錢入院割膽
http://bit.ly/2ngVqNq【劉鑾雄講大劉（2）】
走過三輪水貨 「風扇劉」血淚史：唔夠半年已經冇錢出糧
http://bit.ly/2obalOj【劉鑾雄講大劉（3）】
遭猶太人出賣 大劉：我係廢柴中嘅廢柴，懵炳中嘅懵炳！
http://bit.ly/2mPTGzh【劉鑾雄講大劉（4）】家道中落 老父開廠俾人呃晒 大劉10歲前冇床瞓
http://bit.ly/2nr56WG
【話你知】同大劉有關係嘅名人、美女有幾多？即睇「大劉人物關係圖」: http://bit.ly/JosephLau
|
鍾意就快D Share啦！
|
|
|
