【新增內容】相信大家對人夫郭富城有以下疑問：1.點解要戴紅牡丹襟花？
2.襟花插喺口袋而非左邊翻領上插襟花嘅扣眼，係咪專登？
3.外父係咪真係有個「從小就聽你的歌」？
4.曾投資開拍電影《父子》嘅寛姐邱瓈寛，呻未獲城城邀請出席婚宴，嬲豬話：「下次結婚記得請我！」城城點睇？
5.城嫂Moka係咪雙喜臨門？
……應該仲有好多好多。18號結婚嘅城城，今日就復工喇！不過都係做啲簡單嘢，就係到中環皇后像廣場花園，出席LV嘅「時空．錦．囊」展覽第一輪。噚日城城好兄弟張智霖都有應邀出席LV活動，傳媒係咁問番佢城城婚禮細節，有啲位，跑慣江湖見盡風浪嘅張智霖都話：「我唔識答。留俾城城聽日自己答。」咁城城今日點答？格仔啡色西裝嘅城城，近8時抵達會場，跳跳吓又扭吓身咁行去Backdrop前影相。傳媒恭喜佢啦，佢又華麗轉身，好風騷咁指指大家。城城透露去年聖誕節已經訂咗婚，因為屋企人想低調，所以低調進行。係咪雙喜？城城話﹕「梗係啦，『囍』字係兩個喜，我會努力o架喇，有好消息會同大家講。(係咪未講得？)呢個係好問題，喺適當時候會同大家分享，一直講人生大事，媽媽都想有生之年可以抱到孫，希望上天畀到呢份禮物我啦。」至於生幾多個，佢就笑言未諗定，一步步嚟啦咁，仲笑言：「奶粉錢唔係好貴！」至於話寬姐嬲佢，城城就話對方一向都講得笑嘅。但寬姐話「下次結婚請我」，咁你會唔會嬲呀？城城稱:「開玩笑啫，大家毋須太認真。佢透過小美祝福我，已經夠喇。」可會食餐飯？「咁咪好多人都要輪住排隊食？寬姐係一個我好敬重嘅人，佢明白嘅。佢祝福咗我㗎喇，呢個開玩笑，笑吓就算喇。」
| (攝影：沈健程) | | |
| | | |
| | | |
| | |
|
鍾意就快D Share啦！
|
|
|