豪語錄
4K 宣萱
第三次專訪宣萱。
上兩次環繞何時/如何才重返 TVB，加上其他離巢小生花旦噏來噏去，類似話題一早問到爛。
宣萱今次以行動代替出最佳答案， 4K。
你會話，那只是畫面制式——內容豈不比制式重要？
但所謂內容，「看看劇本好唔好啦」、「看看有冇突破啦呵呵」······陳腔濫調！
劇本到拍攝時可能改，算否突破更有待播映後由觀眾評論；唯獨制式，一個蘿蔔一個窿，在接 job前已可確認。
宣萱說：「這才有保證。」
無愧倫大材料工程學畢業，主流電視史上的先行者，理科人不講門面話。
4K，令人聯想四字頭，七○年生與叮噹同歲，現實沒有時光倒流機，纖毫畢現的解像度對中女是嚴峻考驗。
宣萱府上昨晚剛換新電視機，睇番坦言驚，她不介意告訴你驚，一早 keep fit準備。
女人四十歲前叫貪靚；四十歲後，叫毅力。
在比高清（ 1080）更高清的年代，是時候重新審視宣萱。
改革派
「我得罪好多人。」宣萱說。
為何話 4K代表認真？「五年前離巢已注意到畫面問題，觀眾部電視機愈來愈勁，拍攝方法卻沒變過，有時穿崩的，我們不敢演得太放，用力閂門時布景會郁。
「第一次 4K就台前幕後都打緊十二分精神，執到乾淨硬淨。希望由此作 example，帶起公司繼續投放資源，真的很貴，總有人怕改變，所以我可能得罪了保守派。」
提及錢，宣萱更加務實而不避嫌。
「今次是新人事杜之克聯絡我，五至十分鐘已傾妥，快到你唔信，他開出有誠意的價錢，錢我不攞到盡但需要尊重，當年走便因為欠尊重——對方同我講：『你都唔志在啦加嚟做乜先？』」
還牽涉男女平權。
「我做了廿幾年沒代表作。」也太坦白兼要求太高吧？「係實情。兩年幾前找我，又係演差婆，警匪片一定男人戲，女人是次線，我頂多再『深入虎穴俾人綁架』多一次。你讚我《戇夫成龍》成功？誰是戇夫？是安仔（郭晉安）阿旺呀！睇劇名就知。」
宣萱的「正名」主義很政治正確，何只《戇夫》，她出道作《龍兄鼠弟》、奠定大紅的《難兄難弟》，一律雄性標題，她觸及香港影劇畢竟男尊女卑的成見。
「所以杜生問我想拍什麼，我答女人戲吧，叫《不懂撒嬌的女人》，都考慮過可能 limit咗，但我要表達。」
回頭草
怪宣萱食回頭草？怎說呢，《撒嬌》的班底似乎也離開過""「係全部離開過晒！」答得乾脆：「 TVB像寄宿學校，多嘢學但錢不及外面，兜個圈返嚟，係學會怎保障自己。」
力敵長江後浪推前浪？
「以舊帶新，以前 TVB用此模式很 work，我《龍兄鼠弟》出道時，萬子話我：『做乜唔 mark衫（記戲服）？我答：『有助導 mark嘛。』萬子話：『助導 mark廿幾個演員衫，會有幾準？』於是我至今習慣一手一腳。後來管理層變動，流失舊人，新人起步冇咁穩，我覺得是影響收視下降的原因。
「輪到我變舊人，未回巢前聽聞的新人工作態度，曾經少少驚，好彩 OK。兩個最辛苦的（指自己和男主角林文龍）都可以唔遲到、做足功課，其他人再冇藉口，平時可能遲少少。」宣萱說。
給特別的您
除了「龍兄」萬梓良，其實當年宣萱正與「鼠弟」張衞健亦師亦友——男友的友。她笑了：「他唔瞓背劇本（你陪他唔瞓？）我每晚電話 check到他未瞓。」
快人快語到咁，宣萱果然不懂撒嬌。
「在工作範圍內，絕對係，我不會用來換取什麼，我只對愛的人自然嗲，正如細個嗲父母零用錢。換轉我是男友，會更加珍惜這種女人，人自私嘅，總希望有些事人冇我有。」
拖繼續拍，未有嫁期。連續兩套《沒女》和《撒嬌》話題劇，宣萱怎看港女不婚問題？
「我不覺得是問題，是 case多了。我照去超級市場逐行逐行格價，車壞照坐小巴""」
宣萱你是否答非所問？
「我係話，我是藝人但不介意人點睇；不結婚亦然，本來並非問題，是香港人太介意別人點睇啫。」
相約 8K時
藝人在意的，應該是以下——
「 4K拍得太清楚，那班十幾廿幾也嗌寧願不要 close up。我做新人時才多希望有 close up受重視呢。現在我當然要做足 keep fit和 facial， Mall姐角色演得我精神緊張，放大睇會見我眼睛滿布紅筋，這控制不到。
「公平地講， 4K又方便到後期加工空間，有得執靚嘅。」吃吃笑了。
宣萱實話實說，沒一味標榜自己。「但逼真總是好事。以前我話過生咗小朋友照做，來到這年紀，乾脆不會生不用顧慮。五十歲去到 8K制式時，宣萱無論如何應該唔同樣了，我 believe in自然老，人怎會冇紋？皺皺眉便現，我希望到時每條紋都識得演戲。」
宣萱芳齡四十六，她說的五十歲並非吹到海枯石爛，是面對即將發生也坦然。
的照片也是可以執靚的，現場看到本頁這張相的 sample時，宣萱只叮囑攝影師執走裙上坐皺了的摺痕，沒要求其他加工。
看清
輪到這個 shot，宣萱戲言：
「似在『懶』有情調昏昏暗暗的餐廳揭 menu，我開始有老花睇唔清吧。」
撒嬌的女人，這時面對伴侶情深款款問想吃什麼，可以點？
宣萱說：「我會『隊』番俾佢揀，鬧：『玩我呀？』」
如果年齡相近，男方應也遇上視力問題， yes，坦誠相處，大家對望一笑，與子偕老，何嘗不是更浪漫的撒嬌？
撰文：余家強
攝影：黃志明
攝錄：葉志明
協力：歐陽慧芯
服裝： Hugo Boss
場地提供： Farrington Interiors Ltd at World Trade Centre
|
鍾意就快D Share啦！
|
|
|
