歌手許廷鏗（Alfred）於2009年參加無綫的第一屆《超級巨聲》加入樂壇，憑獨特唱功兼有「將軍澳吳尊」之名獲星夢高層何哲圖（Herman）簽約成為歌手，在無綫及Herman聯手打造下成功將Alfred推上「星夢一哥」位，兼為他舉行處男演唱會，其所唱的歌曲均打入《勁歌金曲》榜冠軍位置，由於Alfred上月底與無綫及星夢約滿，年初已傳Alfred決意離開娘家跳檔去華納。
兩頭唔到岸
回復自由身的Alfred坐定粒六過檔華納接「昔日一哥」周柏豪棒，可惜近日傳出華納突然「煞停」，令Alfred現時「兩頭唔到岸」，原因Alfred改變將經理人簽埋給華納，他有意自組公司自己做製作，只將歌曲交華納發行，華納見唱片市道低迷，每出一張唱片蝕一張，如不簽埋經理人約根本冇得做，所以表明要簽埋經理人約先有得傾，娛樂工作被迫叫停的Alfred幸好有牙醫工作，近日的他頻頻到診所開工。據知，Herman得悉愛將堅決離巢既傷心又憤怒，認為對方不懂飲水思源，更傳出無綫將Alfred列入「不受歡」系列，亦不會為對方稍後推出的歌曲落力播放及打入音樂榜三甲，可算全面封殺。
Herman叫許廷鏗靠自己
Herman在電話中承認與Alfred已約滿：「喺約滿咗，佢話想出去闖吓，咪有佢囉。（覺得佢唔飲水思源？）每個年代睇法唔同，當然公司一直都好栽培同對佢好好。（無綫列佢入黑名單？）當然佢之後嘅歌唔會有高播放，公司一直投放好多資源喺旗下藝人到，以自己藝人行先，間間公司都係咁做。」隨即叮囑Alfred說：「將來佢要靠自己。」而Alfred則說：「入行六、七年都同一公司，要面對轉會關口都唔係好識拿捏，都多謝伯樂Herman由細睇住我大，希望嚟緊日子可以保持良師益友關係，轉會暫時唔算話太急同阻滯，想畀時間同空間自己諗吓方向點做，有咩新消息會同大家公布。」另外，華納發言人承認對Alfred感興趣：「呢刻未落筆簽任何合約，將來有喜訊通知大家。」
|
鍾意就快D Share啦！
|
|
|
