加油呀！
藝人杜汶澤向來有好杯中物的習慣，近月他於社交網站分享美食時，醇酒亦同時入鏡。他透露自己高峰期一晚可飲掉一支白蘭地：「做嘢又飲、配樂、剪片、導演期間，一有空檔亦會飲，都試過畀人影到醉咗被抬走啦，直至早排請新片演員去食飯，送客時同佢哋握手，發覺隻手好痛，所以諗住停吓唔飲，但停咗幾日幫助唔大，我開始懷疑自己飲到尿酸過高！」
個個勁撐
阿澤於是決定「斷酒」，並於社交網站「寫日記」記錄過程，日前進入「斷酒」第六天日的他寫道：「醫生建議假期後抽血檢查一下，尿酸、血壓、肝功能、膽固醇各方面是否正常……過去這六天並不容易，尤其是一個每天飲至少三份一到半支拔蘭地的人，已經控制得好好，（醫生）予以高度讚揚……祝大家身體健康。」隨即獲不少友人及網民畀like並留言力撐，齊齊為他打氣。
唔再自斟自飲
忙於與蘇民峰拍攝節目的阿澤，則透過電訪問表示：「尋晚我約咗醫生食飯，佢同我做簡單嘅診斷，覺得應該唔係尿酸問題，好大可能係之前我考空手道黑帶，練得太多搞到內傷，而飲酒亦好影響內傷嘅治愈情況，所以隻手咪更加痛囉！（戒酒？）咁唔會戒晒嘅，但都年紀大嘞，以後唔會一個人自斟自飲，寧願飲少啲、飲靚啲嘅酒囉，仲要將啲quota用喺喜慶場合，同好朋友一齊有嘢值得慶祝先飲。」而近日阿澤更和太太田蕊妮拍拖去遠足，兩公婆於陽光底下玩遊戲及晒恩愛，身體力行轉換生活模式養生。
來源 source: http://hk.on.cc
|
鍾意就快D Share啦！
|
|
|
