劇痛似生仔 梁麗翹手指險壞死 開席前入院「搶救」
無綫《東張西望》主持梁麗翹（Nicole）前晚在港補擺喜酒，下午與莊思敏及莊思明等姊妹拍照時發生險事，她戴在右手無名指的訂情戒指太緊，令手指腫脹發紫，眾人出盡辦法都未能幫她脫下，陷入恐慌更一度擔心手指壞死要截指，最終惟有大好日子都入院「搶救」，十指痛歸心的Nicole坦言脫戒過程猶如生仔，幸好最終趕及負傷腫住手開席。
32歲的無綫主持梁麗翹（Nicole）二月在美國與圈外男友結婚後返港復工，前晚她在九龍區的酒店補擺喜酒與親友分享喜悅，下午先與姊妹莊思敏、莊思明、莊思華、彭慧中、劉晨芝及謝文欣在總統套房拍攝靚相，但拍攝中途發生小插曲，原本右手無名指敏感的Nicole，因戒指太窄而谷住瘀血，突然腫了兩倍，劇痛難當之下決定入院「搶救」！
Nicole透露當時婚戒戴在左手，因貪靚決定右手都戴上三隻戒指，結果出事：「呢幾隻係老公喺拍拖嗰時，第一次送畀我嘅禮物，算係訂情信物，都值六位數字，我右手無名指本身有啲敏感同痕，戴咗冇幾耐就已經腫，老公有叫我不如唔好戴，我就去除，都用咗十幾分鐘先勉強除到一隻，手指仲捽到更加腫，但我為咗爭取時間影相，忍住痛戴住其餘兩隻戒指繼續影。」
醫生喘氣 護士滴汗
不過，Nicole的情況愈來愈嚴重，手指變腫兼發紫，一班姊妹見狀大為緊張，用盡辦法都未能助她脫戒，陷入一片恐慌中，甚至驚Nicole的手指谷太多瘀血要切除，於是決定入院：「我隻係鑽石戒指，唔係咁易切開，星期六又冇咩診所，叫醫生嚟又驚佢冇工具，終於決定親自去醫院求醫。」
到達醫院後，醫生及護士盡力幫Nicole脫戒，但過程猶如生仔，醫生拔走第一隻戒指後已喘晒氣，護士則攰到滴汗，Nicole說：「佢哋搵條管圈中隻戒指，然後沿手指繞好多個圈，逐啲逐啲拖佢出嚟，我原本手指已經敏感，再咁出力扯出嚟，隻手損晒，但醫生話我忍得痛，只係嗌咗幾聲，我問佢生仔痛啲定依家痛啲，佢諗咗一陣先答係生仔，我諗第時生BB真係要無痛分娩喇！（老公有陪住你？）有呀！佢仲着住Casual衫陪我，好好！醫生話我四、五日都唔掂得水，咁就可以名正言順唔做家務喇！」歷盡個多小時十指痛歸心，終於拔出兩隻戒指。
「豬手」照斟酒
手指仍未消腫的Nicole即趕返酒店繼續與姊妹拍攝「未完的照片」，不過就盡量收起右手以免「豬手」入鏡：「好在趕得切飲宴時間，係心情影響咗啲，晚宴上人哋想同我握手，我都要即刻換第二隻手，同埋用得三隻手指幫人斟酒。（唔介意好日子要入院？）我一向冇諗呢啲嘢，真正婚禮都完成咗，而且每次都有蝦碌嘢，例如註冊當日蕩失路，喺美國行禮就有兄弟買錯菊花，今次就傷手指，但有呢啲深刻嘢令件事更加難忘。」
梁麗翹Profile
年齡：32歲
三圍：33、24、35.5
學歷：波莫納加州州立理工大學音樂商業學士畢業
入行經過：2011年參選港姐並獲「國際親善小姐」及「旅遊大使獎」，雖然三甲不入，但獲邀加入無綫，曾拍《愛．回家》等劇集，更成為《東張西望》的主持。
文：影視組
|
鍾意就快D Share啦！
|
|
|
