分居老公知道改性向
黎明詩認出櫃︰傾吓傾吓就一齊
年約50歲的前歌手黎明詩，90年代出道時憑一身東洋味吸引到當時一班少男注意。她於98年結婚嫁給銀行家老公後急流勇退，04年婚姻出現問題，近日她被雜誌影到與一名同性女子Kelly過從甚密。昨日黎明詩出席活動，大方承認出櫃，更指「啱啱同Kelly開始咗，我啲朋友、老公都知」，但受到前一段婚姻影響，暫未有結婚打算。
半百黎明詩昨日現身銅鑼灣活動，宣佈出櫃，並與老公辦理離婚手續中。
年約50歲、90年代歌手出身的黎明詩，昨日與譚順生在銅鑼灣HMV為「中國新歌聲第二季香港站終極複賽」擔任評判。近日經常出入馬場的黎明詩，早前被周刊拍到跟同性密友Kelly出雙入對，去年4月更一起出席睇關淑怡演唱會，有指二人已經同居。昨日黎明詩在完成評判工作後接受訪問，大方承認出櫃，但否認與Kelly同居。
黎明詩與同性密友Kelly由好友變成戀人，二人去年結伴睇演唱會。資料圖片
歌手出身的黎明詩（右），直言有意復出。
性格好夾
黎明詩表示昨日是應邀擔任評判，近排因為朋友有馬匹出賽，所以經常在馬場出現。問到與Kelly是如何開始及誰人主動時？她笑笑口回應說：「我哋喺由朋友開始，傾吓傾吓就一齊，你明啦。啱啱同Kelly開始咗，我啲朋友、老公都知，我生活得好開心同健康，已經去到另一階段。我接受同性戀，身邊好多朋友都係，接受就得喇。」
對於周刊的報道，黎明詩直言當中有部份是對的，但亦有部份資料錯誤，例如跟Kelly不是幾年前認識。問到她與Kelly的關係及是否有結婚打算時，黎明詩說：「同佢啱啱開始好夾，結婚未知㗎，對上一段婚姻陰影都有影響。起初同Kelly係諗住有個伴，不過大家越嚟越啱傾，可能同佢都係英國讀過書有關。同老公現階段分居，辦緊離婚手續。」
當黎明詩提到Kelly時明顯好開心，她又透露Kelly是自己歌迷，經常都會聽自己的舊歌，她說：「我成日問佢，有冇咁好聽呀？仲話點解唔聽真人唱，如果我復出，佢都支持。」黎明詩表示之前雖然認識不少同性戀朋友，但發展成密友關係，Kelly是第一個。對於跟Kelly是否已經同居時，黎明詩笑說：「我哋分開住，係鄰居，唔係同居。」
當年黎明詩（左）被公司塑造成清純玉女。
黎明詩98年嫁給銀行家老公淡出娛樂圈，至04年婚姻開始出現問題。資料圖片
黎明詩活躍於90年代歌壇，曾於張立基歌曲《異性相吸》晒rap功。互聯網圖片
有意復出
黎明詩早年離開娛樂圈嫁人後，從事過兩年保險業，之後回到英國幫手打理家族生意，而她稍後亦會跟友人合作，搞健康產品生意。黎明詩自言有興趣復出幕前，因為仍然好喜歡唱歌，現在不時都會到卡拉OK唱歌，她說：「不過暫時面對鏡頭都係唔係好習慣，要時間適應，不時都會同圈中人阮兆祥、上山詩鈉同梅小惠見面。」
採訪、攝影：黃曉妍
|
鍾意就快D Share啦！
|
|
|
