由彭秀慧自編自導、周秀娜和鄭欣宜（Joyce）主演的《29+1》，在今屆法國尼斯國際影展榮獲四大提名，包括最佳導演（外語劇情片）、最佳原創劇本（外語劇情片）、最佳外語劇情片及最佳女配角（外語劇情片）。導演彭秀慧及競逐外語片最佳女配的欣宜日前已專程飛去尼斯參與昨晚舉行的頒獎禮，電影公司老闆兼出品人蕭定一亦特別從康城趕去尼斯打氣，結果彭秀慧擊敗12位來自世界各地的不同導演，勇奪外語片最佳導演，為港爭光。
冇諗過攞獎
彭秀慧對於奪得外語片最佳導演殊榮，可謂喜出望外，她說：「好開心可以攞到呢個獎，喺一個國際電影節入面，《29+1》有四個提名已經係好大榮譽，更加開心嘅係今次得獎嘅時候，難得有好多人同我一齊出席頒獎禮，分享喜悅；由於Joyce有提名，我哋可以一齊坐、一齊緊張、一齊等公布消息。最難得係當晚頒發好多唔同獎，宣布每一個候選名單時，見到全世界好多唔同電影被提名，每一齣都好犀利好有水準，所以我同Joyce都係抱住一個有得參與已經好開心嘅感想，尤其係外語片最佳導演被提名係有13個，自己真係冇諗過會攞，所以當宣布有獎時真係好開心。」
蕭定一讚彭導難得
《29+1》中Joyce飾演的角色「黃天樂」，從小到大的夢想就是去巴黎，去年《29+1》拉隊去巴黎拍外景，一年後彭秀慧和Joyce重臨舊地，感覺非常特別，彭秀慧說：「再嚟巴黎係好有意思好感動，喺法國得獎有好多意義、好多感觸，對《29+1》嚟講係好特別，其實好希望所有參與人員都可以喺度同我分享喜悅。」蕭定一則說：「好開心呀，13個人去爭一個導演獎，一個香港新導演居然攞到最佳新導演，的而且確係件好開心嘅事，好難得，開心、恭喜！」
欣宜：導演，辛苦晒
雖然Joyce未能獲獎，但其實她覺得今次有份被提名已經很榮幸，且能見證彭秀慧奪獎一刻亦很感動，Joyce說：「其實參加呢個影展好開心、好緊張，有晒世界各地好多電影一齊競逐每一個獎項，特別係戥導演高興，因為有13個提名，導演要打敗12個人而得到外語片最佳導演獎，所以好開心，亦都因為見證佢拍嘅時候嘅辛苦，同做嘅後期，一齊去諗宣傳，佢係一個好親力親為嘅導演，我覺得佢得到呢個獎係非常之值得。我望住佢，我淨係識講『辛苦晒，You did it！』好似好行、好簡單，但我真係想同佢講所有hard work係值得，即使做呢部戲幾辛苦都好，係會有人睇到。就算嚟到法國，冇人知道彭秀慧、鄭欣宜、周秀娜、《29+1》舞台劇，但係大家都會睇到《29+1》電影入面佢嘅誠意同hard work，所以再次恭喜佢。」
《29+1》屢次揚威影展，去年曾成《香港亞洲電影節2016》閉幕禮電影，美國《 Sedona International Film Festival 》榮獲「導演評審獎：最佳劇本獎」、《大阪亞洲電影節2017》壓軸大獎「觀客賞」，以及入選克里夫蘭國際電影節（Cleveland International Film Festival）。
|
鍾意就快D Share啦！
|
|
|
