Loey加油！！
藝人鄧麗欣（Stephy）帶領排球隊Loey參加「第37屆全港公開排球錦標賽2017」女子乙組賽事，雖然之前嗰3場比賽表現未如理想，但今次Loey比之前打得放咗，默契都好咗好多，但最後都以局數2比1落敗。比賽期間，Stephy只係出場幾次，狀態似乎麻麻。
自爆頸稚移位導致發炎
接受訪問時，Stephy表示今次球隊默契確實比之前幾場好，如果可以揸緊第一場就唔使打得咁辛苦。不過自己就因為頸稚移位導致發炎，所以冇得落場打咁多。問到係咪因為工作而受傷，她直言係關生活習慣事：「上星期開始覺得練完波之後唔舒服，以為瞓完覺就冇事，但尋日就好痛去咗睇醫生。所以今日比賽要臨時變陣。（會唔會影響到之後嘅比賽？ ）一場還一場，下次都要重新嚟過，影響實會有，見到佢哋好似都唔係幾開心。」提到輸了4場賽事，對今季可有什麼期望，Stephy坦言唔會諗升班，只希望唔好跌落丙組。
忽然換教練
至於問到係咪換咗教練，Stephy笑言：「你咁都認得？係呀，教練同之前唔同，佢好忙，有啲分身不暇，依家個教練係以前同屆青年軍嘅師兄，佢都好忙有幾隊波教緊，但係都義務嚟幫手。（係咪因為之前教練同球證有嗌霎而換教練？）唔係，唔關事，其實嗰件事之前都有諗過，換人係替補住先，因為佢真係好忙。」另外，談到工作方面，Stephy表示要開始籌備拍攝電影，但好彩球季去到6月底7月，而時間都配合到，所以可以打到日後嘅比賽。
來源 source: http://hk.on.cc
|
鍾意就快D Share啦！
|
|
|