現年53歲嘅凍齡男神吳啟華，第二任內地老婆石洋子比佢細21年，兩人喺3前年結束7年婚姻，8歲囡囡吳熙兒交由住長春嘅外婆照顧，面對父親節呢個日子，身為父親嘅啟華卻冇乜大感覺，反而覺得自己愧對女兒：「我係唔及格父親！」經歷過兩段失敗婚姻，令啟華對獨生女更加憐惜，有空就帶前妻陪囡囡去旅行，又喺社交網分享父女扮鬼臉相，更不時被影到兩父女親密行街，令女兒感受到家庭溫暖。但啟華接受《蘋果》電話訪問時卻自責：「我根本唔係帶子洪郎，一年見得個女幾次，都係外母湊，作為一個爹哋，我覺得自己絕對唔合格！因為自己花喺囡囡身上時間太小，日日都要做嘢，唔得閒陪佢，多數都係佢放假同佢去旅行，或者佢嚟香港嗰幾次。」雖然兩父女相處時間唔多，但囡囡越大越清秀，似足爸爸，問到囡囡係咪好黐自己？啟華笑謂：「佢細個嘅時候就黐我，o依家我見佢咁少，佢點黐我呢，由細到大都係外婆湊佢，佢就比較黐佢外婆，爹哋媽咪都唔喺佢身邊，外婆梗係特別錫佢。有時外婆搞佢唔掂，就要我做嚴厲嗰個，佢會比較怕我啲，我惡起上嚟好得人驚，哈哈！但當然唔會打佢，只會鬧佢。」稚子無辜！問到當初點同囡囡解釋，父母要分開呢？啟華坦言：「離婚嗰啲問題，我冇直接同佢講過，可能佢都唔知亦唔明，因為放假我哋會一家人去旅行，我會帶埋外婆一齊去，每次幾乎都係四個人，除非洋子唔得閒，或者我要拍戲，就會三個人去，喺嗰個情況之下，佢唔係好明白分開係乜。」啟華希望盡力為囡囡維持完整家庭：「雖然我哋住嘅城市唔同，但佢未必完全明白我哋離婚嘅嘢，我亦都唔想太過講得咁白畀佢聽，等佢慢慢大啲再了解，或者等佢問我先同佢解釋，反正我哋四個去旅行玩得好開心，畀佢保持一個好似完整家庭感覺，佢由細到大都未試過有爹哋媽咪一齊喺身邊住，由出世到o依家都係得外婆主要湊佢，佢可能已經習慣呢個環境，知道父母都要做嘢。」問到對囡囡有甚麼期望？啟華表示：「其實主要係希望佢開心，譬如讀書寧願畀多啲錢，畀佢行國際學校呢條路，睇住朋友嘅細路讀傳統學校功課太多，小朋友太忙都唔係咁開心，囡囡o依家都係忙，但佢會開心啲，因為有好多課外活動，好似學琴，運動又多，課功冇咁多，生活開心啲，我冇乜期望，只係希望佢開開心心成長。」
想隨時獲得更多親子資訊，快啲like Easy PaMa Facebook
https://goo.gl/1qWM8g
|
鍾意就快D Share啦！
|
|
|