熱爆娛樂: 畢架山 3億新屋過夜　 34歲阿 Sa瞓身長揸百億麻雀館太子爺 [壹週刊

2017年6月29日星期四

畢架山 3億新屋過夜　 34歲阿 Sa瞓身長揸百億麻雀館太子爺 [壹週刊 - 1425] __,阿 Sa,蔡卓妍,M1,

鬼祟護送

闊少男友 Anthony為低調戀情，送女友出門都戴番副超，及只探頭出門外目送，認真小心。

娛頭

畢架山 3億新屋過夜　 34歲阿 Sa瞓身長揸百億麻雀館太子爺

嫁過爛玩鄭中基，又在 William（陳偉霆）的一段姊弟戀重創，學精了的阿 Sa（蔡卓妍）終於識搵對象，其新歡正是連詩雅前度，身家百億的麻雀館靚仔闊少石恆聰（ Anthony）。鑽石王老五為他封盤，阿 Sa亦瞓身投入，一連幾晚，收工即趕到男友的三億新屋過夜，陪到實。

Anthony與阿 Sa打得火熱，失筍盤的連詩雅卻不甘心，為𢱑番呢張飯票，連月來以 WhatsApp攻勢死纏，明知阿 Sa已成前度新歡，亦擺明挑機，發功𦧲復合。

馬天佑撮合

先後俾鄭中基同的士陳 William傷完又傷的阿 Sa，感情真空兩年，近月終於擸實超級筍盤。原來今年四月，她秘密與連詩雅前度，家族身家深不見底的三十多歲百億麻雀館太子爺 Anthony（石恆聰）拍拖。

據悉去年跟連詩雅復合的 Anthony，因再發現女友姣性難馴，租下畢架山豪宅給她住，照顧周到仍背住他不停 flirt仔，嬲爆下今年初決定跟拖拉三年的連詩雅關係斬纜。筍盤重新上市，經好友造型師馬天佑一手撮合， Anthony又火速為阿 Sa封盤。「 Anthony啲 friend好驚佢俾 Shiga（連詩雅）氹幾氹又心軟，好想佢快啲有新對象。 Mayao（馬天佑）係 Anthony同阿 Sa嘅 common friend，約埋玩，萬人迷遇上筍盤，一撻即着。」知情者爆。

石恆聰 Anthony

Anthony有米有樣，成六呎高，是城中鑽石筍盤。

今年三月， Anthony一炮過以三億買入畢架山豪宅，與其他三位兄弟妹共同持有。

阿 Sa同周柏豪孭飛的電影《原諒他 77次》，近日票房大收，而周柏豪亦跟連詩雅傳過緋聞。

據知撮合阿 Sa同鑽石筍盤 Anthony的紅娘，是二人的 common friend馬天佑。

阿 Sa是何超蓮的老友，而 Anthony亦在超蓮的朋友圈內，兩個老友變拖友，超蓮唔怕做電燈膽，不時約埋食飯。

好想復合的連詩雅，經常埋身 Anthony細妹 Stephnie，更會 po二人合照。

「媒人」馬天佑跟 Stephnie（石佩藍）好老友，跟 Anthony亦十分熟落，是石家兄妹聚會鐵腳。

到豪宅過夜鉗實

重獲愛情滋潤，近日為電影《原諒他 77次》四出宣傳的阿 Sa相當風騷。就算工作忙到甩轆，阿 Sa都一定攝時間拑實有樣有米的闊少男友。本週日（六月二十五日），踩完一日謝票活動的她，一收工就坐住七人車，飛奔到男友今年買入的三億畢架山新屋過夜。

當晚阿 Sa的七人車到達三億豪宅門口，等了五分鐘，急步行返大宅的 Anthony，見女友一早守候，即拿拿臨按密碼開閘，讓女友阿 Sa的七人車駛入，放低阿 Sa後七人車便離開。

26/6　 10:00am

在男友三億大宅過夜後，阿 Sa晨早出門開工，離開時有石家一名中年女子護送及先在門外睇環境。

之後登上自己的七人車去開工，當晚做完嘢又再趕到男友家度春宵，熱戀期黐到實。

25/6　 23:00pm

前一晚阿 Sa為電影《原諒他 77次》忙完謝票，即到男友家過夜，返家的 Anthony親自開閘俾阿 Sa的車駛入。第二日離開衫都冇換。

低調保護戀情

阿 Sa上年派福利， po上網的性感泳照，被網民大讚愈來愈索。

纏綿一晚，翌日要開早工的阿 Sa，焗住晨早十點就要走。她由石家一名疑似管家中女陪伴離開大宅。為保護剛開始的關係，阿 Sa與 Anthony顯得額外小心，該名中女先行到屋外視察環境，才讓阿 Sa步出，而男友 Anthony則戴住副超，伸頭出門口，鬼祟目送女友上車。

兩個月已融入石家

有拖拍，阿 Sa近期明顯悉心打扮，有光采。

雖然同 Anthony拍拖只係兩個月，但據悉阿 Sa已融入石家上下，加上個底唔花，靠自己本事手揸過億磚頭，跟 Anthony的前度蒲精連詩雅，條件差天共地，故阿 Sa甚得石母歡心。

不過阿 Sa同百億身家 Anthony熱戀甜蜜，又有石媽撐，仍有隱憂。據悉因貪玩失筍盤靠山的連詩雅唔願放手，不時𦧲住前度求翻撻。得悉 Anthony同咗阿 Sa一齊，神經更被觸動，加倍發功，近日向 Anthony的胞妹埋手，明向阿 Sa挑機。

求復合向石妹埋手

前度連詩雅　死𦧲求復合

據悉失大碼頭的連詩雅得知 Anthony的新歡是阿 Sa，即發功挑機，狂𢱑復合。

「同 Anthony分手之後， Shiga都冇停過𦧲復合，因為佢知道 Anthony性格，好易心軟，仲不時 send WhatsApp撩 Anthony傾偈，就算 Anthony冇覆佢都照 send。佢同 Anthony細妹 Stephnie（石佩藍）幾 friend，就成日約 Stephnie食飯，打聽佢阿哥近況，叫佢幫吓口。

「不過 Anthony屋企人鍾意阿 Sa多啲，尤其石 auntie，覺得阿 Sa有本事揸咁多磚頭，就算唔係竹門對竹門，都磚頭對磚頭，唔係貪個仔啲錢。話晒一出道就紅到依家，好少負面新聞，對比連詩雅，真係蚊髀同牛髀，所以就算俾 Shiga𦧲得番復合，都未必俾入門。」知情者說。

瑞興麻雀館後人

年約三十多歲的石恆聰，是「麻雀大王」石鑑輝的後人，其家族開辦瑞興麻雀館，更開到海外的華人區，財雄勢大，家產深不見底。石鑑輝在「男拔」畢業， 30年加入警隊，曾為四大華探長呂樂身邊的紅人，退休後買下大量油尖旺物業， 13年家族更以 9300萬買下中環全幢物業，又坐擁九龍塘森麻實道 1號，市值五億的地皮，物業遍布多個國家。為石鑑輝後人的石恆聰，個人手持至少兩個物業，持有廿間公司，據悉他主力為家族打理物業，其妹石佩藍在中環開三層式美甲店。

石恆聰夠疏爽　連詩雅唔放過大水喉

連詩雅同百億闊少分手數月都唔願放手，全因呢位闊少對女友疏爽。原是有錢女的連詩雅，因父親生意失敗，兼拋妻棄女，家道中落的她，與母親搬到灣仔劏房相依為命。直至 14年泊到好碼頭石恆聰，衣食住行照顧周到，可重享富貴生活。

月租五萬豪宅安頓

14年石恆聰月租五萬畢架山龍景樓給連詩雅兩母女入住，又安排司機接載出入。當時兩母女被影到拖住篋，細屋搬大屋。石恆聰手持另一薄扶林碧瑤灣千萬磚頭，也是當時二人的愛巢。

闊少做埋外賣仔

雖是闊少，但石恆聰冇少爺架子，陪連詩雅坐公園傾偈，甚至做埋外賣仔，俾女友醫肚。可惜連詩雅唔珍惜， 15年瞞住男友，在電影《野狼與瑪莉》裡面含「巨鵰」，令石恆聰冇面兼激到扎扎跳嗌分手。

去年底曾復合

一直恨嫁入豪門的連詩雅，與石恆聰三年來離離合合，去年底更一度復合。對女友細心的石恆聰曾被發現在巴黎世家買「包包」送給連詩雅。不過有傳男方發現她背住𠝹仔，決定斬纜。

連詩雅連𠝹23仔

視陳冠希為偶像的連詩雅，入娛圈前已戰績彪炳，被指在夜場連界 23仔，入行後更分別與關楚耀、周柏豪等傳緋聞。不過最爆莫過於 12年流出 16歲時跟 Hip Hop Rapper曲赤的親密舌戰相，令玉女形象破滅。

阿 Sa手揸物業多過男友

阿 Sa出道 17年，吸金能力強，加上背後有個對投資磚頭有心得的 Sa媽做軍師，早已榮升小富婆有過億物業揸手，男友 Anthony雖然家底豐厚深不可測，他個人只持有兩個物業，但其中今年四兄弟姊妹聯名購入的三億豪宅，已經證明財力驚人。

阿 Sa隱婚 4年

2000年出道的蔡卓妍，多年來跟唔少一線男星傳過緋聞，第一個是合作港台節目《青春@Y2K》的余文樂，之後有指拍電影撻着陳奕迅、謝霆鋒以及暗戀過鄭伊健，不過統統被阿 Sa否認。

04年，跟鄭中基合作電影《追擊八月十五》撻着，直至 09年才肯承認戀情。 10年 3月，二人被踢爆在 06年 1月於洛杉磯 Van Nuys區秘密註冊結婚，他們隨即開記者會承認結婚，不過同時亦宣布已辦妥離婚手續，夠晒反高潮。恢復單身後，阿 Sa數月後宣布跟師弟陳偉霆姊弟戀，拍拖五年， 15年二人齊發聲明宣布分手，阿 Sa表示二人「我們的愛也不像自己想像中堅固」，而陳偉霆則被指跟同劇演員趙麗穎戲假情真，阿 Sa隨即幫前度澄清。再度單身的阿 Sa，去年底公開表示恨結婚生仔，唔夠幾個月，原來已經擸到筍盤。