楊冪話自己唔放屁唔撩鼻屎，果然係靚女呀！
台灣女星小S（徐熙娣）主持嘅綜藝節目《姐姐好餓2》最新一集邀請咗楊冪做嘉賓，而喺節目預告中，楊冪多次自嘲，搞到小S都差啲招架唔住，不過遇強愈強，兩人仲愈講愈多，楊冪仲話自己唔會放屁𠻹！
眾所周知，靚女係唔會屙屎、唔會放屁嘅！睇嚟楊冪都知自己係靚女嚟，好有自信咁話自己唔會撩鼻屎，唔會放屁，搞到小S都就嚟反白眼問佢：「你是人嗎？」不過，其實佢哋都係講笑啫！
楊冪唔只講自己，連好姊妹林心如都「出賣」，踢爆林心如減肥內幕，再補多刀話：「看她好像也沒有甚麼效果！」小S聽到都忍唔住話：「Oh My God，原來你是笑裏藏刀的人！」
跟住楊冪繼續自嘲又自揭缺點，身材高挑嘅佢話自己手臂其實有好多肉，呢個時候小S走去摸，一摸完誇張Mode話：「怎樣那麼囊？」小S都出名轉數快問題又夠直接，當佢望住楊冪條長腿時就問：「有沒有打陰影？」點知一山還有一山高，楊冪再發功，「自爆」大髀開刀抽脂又話塊面咁白係化咗好厚粉底，自嘲功力同佢啲粉底一樣「非常深厚」，睇嚟「女神」小S遇上呢位女神，應該「鬥餐死」喇！
來源 source: http://hk.on.cc
|
鍾意就快D Share啦！
|
|
|
