80歲的四哥謝賢最近又做番電視劇男主角，上世紀《千王之王》年代重臨。感覺十分夢幻。對上一次四哥為無綫拍劇，已經是三十年前的事。今日四哥再次成為周刊封面人物，同樣令人感覺夢幻。幽默的四哥，在專訪中帶出幾個重點：
1.冇錢。80歲人，後生嗰陣搵好多，但money easy come easy go，同行賺到錢識買磚頭保值，四哥話自己嗰陣買完就賣，錢，使晒，又冇積蓄，又唔識諗將來，依家連物業都冇。「我真係冇錢剩。」2.講開物業。上月四哥以8,500萬元，購入淺水灣道單棟低密度住宅怡峰，實用面積約1,939方呎，兩房兩廳連套房，實用面積呎價43,837元。原業主獲利約4,000萬。物業係霆鋒送嘅，數月後入伙。四哥喺訪問中笑稱，好快會俾番霆鋒，加多句：「放心！」四哥份人真係呢……3.個仔送咁大份生日禮物，四哥當然好開心，但把口就話霆鋒可能係「良心發現」，然後又抽下自己水，話霆鋒賺埋咁多，做老竇嘅又冇錢又冇屋住，咁梗係旨意個仔啦——咁樣樣。但講真，要8,500萬，四哥都戥霆鋒肉痛。4.點形容同霆鋒關係呢？四哥嘅答案竟然係：唔熟。
點樣為之「唔熟」？四哥話，就好似，佢冇個仔，霆鋒冇老竇，又唔一齊住，亦唔係成日見。四哥加句「講真」增強可信性。
唔熟又點會送8千幾萬嘅物業俾老竇？四哥呢句真係講真：佢OK嘅。
四哥話，霆鋒同佢一樣，都係好顧家，而且好錫佢。人類慣常用一個謊言冚另一個謊言，四哥就用一個個謊言混淆肉麻真心話。其實…真係唔知佢邊句真㗎!
|
鍾意就快D Share啦！
|
|
|
