丁子高與太太楊千嬅2012年誕下愛情結晶品丁進諾(Torres)，轉眼間兒子已經五歲。丁生說自己做父親的身份都只有五歲，父子倆共同成長。他說自己是一個不合格的怪獸家長，即是本身不怪獸，但要符合市場環境才無奈變成怪獸，因此不合格。他認為路是孩子自己走的，作為父母就是附助子女去實現自己的夢想，這樣就足夠了！
個仔驚爸爸
丁子高（Real）與楊千嬅2009年結婚，婚後三年誕下兒子Torres，今年已是他第五個父親節，他說：「其實第一年做爸爸嘅感覺會強啲，之後就係去學點樣做一個爸爸，Torres五歲，我做爸爸身分都係五歲，我哋係一齊成長。做父母要學習點樣同仔女溝通，有時大人唔一定係啱晒，教仔時都會啟發到自己。好似個仔有個同學每日喺課室就倒杯水出窗口，老師話咗佢好多次都唔聽，跟住老師忍唔住好嚴厲咁話佢，小朋友解釋，知道水遇着陽就會見到彩虹，其實呢個原因係好sweet，多啲了解小朋友行為嘅背後原因，有時大人都會有得着！」
要畀自主權佢
Real坦言在家中自己是嚴父，千嬅則是慈母角色，他笑說：「基本上我都唔使出聲，一個眼神佢已經驚，媽咪始終容易心軟，同埋小朋友係識分，所以就算千嬅惡佢都唔會驚。其實我同個仔好似朋友咁傾偈，同佢講道理，獎罰分明，公平對待！」現今不少家長為了孩子將來，都變成旁人眼中可怕的怪獸家長？Real對此說：「喺香港的確好難唔怪獸，但我諗我係一個唔合格嘅怪獸家長，我會做到畀個仔有自主權，我作為爸爸嘅身分就去幫助佢實現夢想，例如如果佢18歲時同我講想做嘢唔讀書，如果佢個理由說服到我，我會畀佢試，唔會堅持讀晒大學先可以做嘢咁！」
計劃一家去旅行
Real表示Torres五歲以來，每次去旅行都定會有工人或父母同行幫忙照顧，所以他正計劃一個只有一家三口的旅行，他續說：「好多朋友話，冇Daddy媽咪同工人參與嘅旅行，會係一個好特別嘅經驗，不一樣嘅感覺，因為真係每分每秒都一齊相處，相信會幾得意，我都好期待！」相信對小Torres來說，這個也是一個難忘的兒童回憶呢！
|
鍾意就快D Share啦！
|
|
|