宅男女神簡淑兒（Jessica）擁有一雙電力十足的腰果眼，近年歌視兩棲發展，在電視劇《愛．回家》及《迷》獲得不少注目，同時她又是組合少女標本成員，經常出騷唱歌，吸引大批男Fans支持，最近Jessica首度推出單飛歌曲《我不是女神》，顧名思義，她想透過歌曲表達自己真實一面，Jessica說：「今次再同伍樂城班底合作，我同佢哋傾過，份歌詞好似為我度身訂造咁，有一句『我是平凡人未恨滿分』，我唔係100分女仔，都唔要100分愛情，只想搵個簡單男仔同我『英勇下去走下餘生』，呢啲都係我自己真實諗法！我覺得做女神拍拖係艱難啲，呢啲唔係我最想要嘅注目，即係1,000個Like都唔及身邊人講一句好靚！（呢一年有冇人追？）冇呀！首歌係幻想咋，最近都比較Dry，以前覺得工作至上，到慢慢工作有進步，就希望感情上遇到適合男仔，都想拍拖嘅！」Jessica笑言要透過訪問「徵男友」，問到擇偶條件，她表示以前喜歡高大及溫柔男士，但現在最重要是啱Feel：「Set好一啲條件，到你遇到啱嘅人嗰陣都唔會理，如果問我比較Buy邊Type，我覺得當男士對我溫柔，我就好易心軟，有啲男士平日好硬朗，但只係對我好溫柔，我就溶晒！」
女神稱號變壓力
講到去年突然升呢被封女神，Jessica表示壓力倍增，自覺愧不敢當：「畀人讚當然係好事，但我唔係女神，感覺好重，我擔當唔起呢兩個字，開頭係有啲抗拒，感覺依家女神呢個字都幾濫用，我心目中女神係周慧敏、邱淑貞，我絕對未去到咁嘅程度。（你覺得女神要有咩元素？）一出嚟就艷壓全場，女仔見到都覺得靚，同埋有獨特氣質！我嘅性格一啲都唔女神，比較男仔頭、爽直、咩都講，唔係咁顧形象，我鍾意打Wargame、揸電單車，呢啲都唔係咁女神，我做嘢時會打扮得靚，其實平日係唔化妝，會着瀨屎褲、T恤。」
同品牌Crossover做善事
為配合新歌，Jessica與時裝品牌大玩Crossover，她親自設計T恤及袋上的Logo，所得收入更會捐予慈善機構，幫助患重病小朋友追尋夢想，女神果然有愛心！講到設計構思，她說：「我首歌旋律比較簡單，所以都用簡單線條，諗過直接寫中文歌名，但唔夠特別，直譯英文I am not a goddess，又好少人咁講，於是用咗呢句the girl next door，亦都係形容緊自己，我唔係高高在上女神，只係普通女仔。（本身擅長畫畫？）大學有副修美術，但好耐冇畫，都諗咗一晚，至於個自畫像就係卡通版，特登冇畫對眼，啲人話我腰果電眼，希望大家唔止係鍾意我對眼。」
場地：OVER LAB
髮型：Daniel＠salonamarone
服裝：SPARK ONLINE SHOP
|
鍾意就快D Share啦！
|
|
|
