熱爆娛樂: 【歷代阿May】全智賢陪黎明上天山「Just to say hi」最經典 _

2017年6月16日星期五

【歷代阿May】全智賢陪黎明上天山「Just to say hi」最經典 __,黎明,全智賢,

童愛玲當年憑同黎明合演電訊商廣品、飾演第二代「阿May」而走紅，其實歷年嚟做過「阿May」嘅模特兒，發展都幾好，最紅嗰個，仲係天后級！講緊嘅係韓國一級女星全智賢，佢都係「阿May」之一，當年個古仔講黎明去天山散心，點知遇上全智賢，嗰個廣告嘅經典對白係「Just to say hi」。另一個「阿May」，就係月前誕下一對孖B嘅楊采妮（Charlie），喺1997年播出嘅廣告，當時Charlie同馮德倫飾演一對姊弟，因為馮德倫反叛出走，黎明為咗去救番對方，上演一幕「要贏人，先要贏自己」嘅笨豬跳，嚇窒馮德倫，最後？當然係奪得美人歸。至於早前返香港出席公開活動嘅Lee Ann（李鞍），相信大家唔會陌生，其中喺佢哋兩個去滑雪嘅古仔入面，「阿May」LeeAnn發小姐脾氣走咗去，點知喺雪山中受傷，黎明捨身相救，Lee Ann一句「我係咪好任性呀？」同黎明嗰句最佳回答「係，不過係我揀嘅」成為一時熱門對白。而最後一代嘅「阿May」大家仲記唔記得呢？係「不死子珊」徐子珊擔任！當時子珊已經係港姐冠軍，佢喺古仔入面同黎明出海捉魚，點知黎明爹哋病危在床，子珊為咗幫黎明可以快啲返出巿區探爹哋，陪跑到碼頭再送黎明出海，有別於一貫嘅男女愛情線，呢條父子親情線都新鮮。

（資料圖片）	黎明同全智賢合演過電訊商廣告（資料圖片）	當年嘅全智賢已經好有氣質（資料圖片）
楊采妮都做過「阿May」（互聯網圖片）	仲有攬攬場面，左邊嘅馮德倫係做Charlie細佬。（資料圖片）	Lee Ann嗰一輯廣告嘅「我係咪好任性呀？」係經典廣告對白之一（互聯網圖片）
徐子珊當選不久，就獲安排同黎明拍廣告。（互聯網圖片）	呢個廣告去到日本拍，當時黎明同徐子珊更傳緋聞。（資料圖片）