現年35歲黃心美同台灣老公Thomas拍拖五年半，結婚四年半，可惜聚少離多，最後離婚收場。有指黃心美離婚後並冇攞前夫一分一毫贍養費，性格獨立又硬淨嘅佢話要精子唔要男人。回復單身嘅黃心美早前被影到約會保釣烈士陳毓祥囝囝、ViuTV藝人陳安立，佢哋孖咇放狗而爆緋聞( 新聞連結：http://bit.ly/2sV42At )。黃心美同陳安立異口同聲否認緋聞，陳安立話大家零發展空間，不過佢大讚黃心美好女仔，仲話會為佢做媒，但自嘲精子唔夠優質，唔可以借種畀黃心美( 新聞連結：http://bit.ly/2tJ5UtU )。不過睇嚟陳安立都唔需要啦，因為黃心美身邊不乏追求者。讀者林先生日前透過《蘋果》嘅「爆相爆片」，分享失婚黃心美喺灣仔約會四眼男撐枱腳嘆意大利餐。林先生日前接受電話訪問時話：「間餐廳多數係外籍客，嗰晚約7點幾，黃心美戴住副有框鏡入嚟，同行有位高大有型男士，年約30多歲，佢哋好好傾，因為餐廳幾滿，佢哋只有坐吧枱，坐低咗，黃心美就放下戒心除咗眼鏡，佢哋一齊叫嘢share食，女嘅飲啤酒，男嘅飲cocktail。女嘅仲同嗰男仔講佢聽日工作安排。」林先生形容黃心美刻意扭轉身同四眼男傾偈，不停放電：「撥長髮至少50次，佢哋一碟意粉兩份食，行為親密，男嘅仲將手搭咗去黃心美背，傾傾吓又伸手輕拍女方背部，似係安慰佢，佢哋好似熱戀情侶。」林先生最強調係黃心美新歡嘅四眼男，絕對唔係陳安立。黃心美對於被爆指有四眼男新歡，佢日前回覆《蘋果》時話：「係呀，我嗰晚同朋友喺灣仔食pasta，普通朋友食餐飯，咁朋友唔係男就係女，好多謝大家咁關心我嘅感情生活，但以我咁直率性格，我有好消息會話畀大家聽，多謝大家關心，希望大畀啲空間我，下次『爆相爆片』有錢就等我自己嚟。」
| 讀者林先生話見到黃心美同一位四眼男食意大利菜。(讀者林先生提供圖片) | | |
| | | |
| | | |
|
鍾意就快D Share啦！
|
|
|
