中學文憑試今日放榜，今屆共有6位考生考獲7科5**，包括3男3女，其中1位女狀元林莉雯(Maggie)更於數學延伸部分M2亦考獲5**，屬今屆的超級狀元。
林莉雯就讀拔萃女書院，她除了4科主科，在生物，化學，經濟及M2都得到5**，共奪得7科半5**的佳績。Maggie直言得到佳績十分興奮，「冇預計過咁好成績」，她表示希望在本地升讀醫科，「有好多原因，媽媽曾經病過，我想本住幫人之心去讀，覺得醫生好偉大，我想用知識去幫人，而且由細都被醫生呢份職業吸引。」Maggie稱，想多謝父母的支持及學校老師的幫助。
被問到事前如何備考，林直言要瞓夠先溫書，「每日瞓足8個鐘先溫書，我會睇電視減壓。」至於港大會為7科5**狀元提供全額學費減免，Maggie會否以此作考慮，Maggie的媽媽稱學費不是主要考慮，要視乎那間大學最適合女兒。
Maggie本身已考獲八級鋼琴，更有一位於英國劍橋大學就讀二年級Human Social Political Science的哥哥。Maggie直言家人給予她非常大的支持及空間，「佢哋令我知錯唔緊要，但要知錯喺邊，唔好再錯。就算我考得唔好，佢哋會話下次做好就得。佢哋唔會迫我太緊。」
Maggie透露，自己是學校社會服務學會的副主席，更是領袖生，自己注重時間管理，令自己在學校公職及學業上取得平衡。她表示自知學習基礎好，但仍需補習，「我高中開始補習，有補習數學，知自己基礎好，但想有個老師比我問問題。真正不停溫書係中五下學期，但平時都有溫書。」Maggie透露考試期間擔心中文及通識科成績，「因為中文同通識要靠平時操練，唔可以死背，我擔心準備得唔夠。」
一直在Maggie身邊陪伴的林母表示，為女兒感到驕傲，又好開心女兒的努力得到認同，「我成日同仔女講係咪聰明唔係最緊要，勤力先係最緊要。我喺紀律性方面好嚴格，例如作息時間上。但我會同佢哋講讀書係為咗佢哋自己，盡咗力就係好。」
Maggie被問到對新政府有何期望？她表示希望新政府能盡力促進社會和諧及推進社會進步。談到對增加教育開支新措施的看法，Maggie認為是好事，「知識係自己嘅資產，其他人攞唔到，令更多人接受教育係好事。」
|
鍾意就快D Share啦！
|
|
|
