歌手李克勤舉行歌迷會活動順道宣布演唱會終極加場，由9月3日至11日共9場，不過因早上曾發出8號颱風警告，令歌迷會活動臨時延後時間，待下午轉為1號風球才順利舉行。現場約有200歌迷風雨不改到場，大會更準備了9個蛋糕來賀克勤加場。
歌迷優先訂飛
講到打風，克勤表示：「嚇鬼死我，尋晚先至返香港，因為有3日假期同小朋友去咗新加坡玩，依家加場加到第9場，已肯定冇期，亦唔會開日場，依家幾好，長長久久係幾靚仔嘅數字，希望呢場歌迷會可以買到，因為一直都唔知邊場先係尾場，所以希望呢場佢哋可以買到。」克勤除在歌迷面前宣布加場，更表示讓歌迷會能優先訂票。
自認有「波地老鼠」
克勤表示：「尋晚工作人員先至話3號唔會改掛8號，所以呢啲嘢係唔可以亂講。今次成個騷係全新製作班底，搵咗Wyman（黃偉文）嚟做形象，識佢好多年一直都喺音樂上合作，今次我親自打畀佢同佢講：『兄弟呢個騷好緊要！』喺轉咗公司後，希望可以畀唔同感覺大家，包括形象方面。（服飾上有冇底線？）下星期會同Wyman、老婆（盧淑儀）一齊去日本，佢哋叫我掹住衫尾跟住後面行就得啦，其他嘢佢哋兩個會搞。」問到可會操肌？克勤笑言：「不嬲有『小波地』、『小老鼠』， 反而佢哋叫我唔好咁勤力練得太大隻，搞得太大嘅話啲衫唔啱着。」
怕裸泳嚇親細路
講到之前被拍到一家四口游水，見克勤身形很Fit沒有肚腩，克勤謂多年來很少被人影到游水相。太太被拍到舉高腳？克勤即言：「佢（太太）嬲咗3日，但好彩影到佢，唔係仲以為我放料。不嬲自己警覺性都好高，但真係睇唔到泳池有相機，可能係一早埋伏咗。（唔敢香港游？）所以咪去咗新加坡囉，間房有泳池可以唔使着衫。（裸泳？）唔得，嚇親小朋友。」
效果勝過歌酬
問到加場可有加歌酬？克勤稱：「呢個又未講過喎，一路都有講以製作為主，製作好攞少啲歌酬都冇所謂，最緊要出嚟效果好，不過相信楊生都唔會虧待我嘅。」
|
鍾意就快D Share啦！
|
|
|
