啱啱喺榮升做媽媽嘅吳若希，產後一直都keep住休養，而今日佢終於復出喇！喺將軍澳出席活動，生B之後第一次公開見人，至於產後第一個活動嘅酬勞係咪好高，佢就話六位數字。佢着住5吋高踭鞋，生完BB之後，足足肥咗40磅，所以坐完月之後，要努力做運動減肥，佢仲話o依家減咗20幾磅，仲話減多5磅就收手。今日吳若希收起性感，問到做咩封胸，佢就話：「呢啲係留畀我個女食，o依家佢日頭食人奶，夜晚就食奶粉，所以食到阿女肥嘟嘟。」吳若希o依家母性大發，成日都會掛住BB，今日喺澳門嚟嘅時候，都掛住同阿女講byebye，所以走咗一班船，仲話坐船嘅時候，都不停咁睇阿女嘅片。問到老公有冇一齊過嚟？吳若希就話：「佢要喺屋企湊女，佢好叻，識得換片、沖奶、沖涼，唔係個個爸爸識，生完嗰時有姑娘教我哋，陪月姐姐都有教。」吳若希又話o依家正式復出，因為啲假都放完，要開始做嘢，講到喺佢生B休息呢段時間，佢師妹菊梓喬走勢好強，幫大台唱好多歌，吳若希就話：「我都覺得佢唱歌好好聽，好鍾意佢把聲。」問到o依家出返嚟做嘢，係唔係怕一姐地位被人動搖，佢就話：「我冇地位，從來都唔係一姐，我係阿妹，個個都叫我做阿妹，我自己都好享受，老闆早幾日都打畀我，話準備咗幾首歌畀我唱，如果我練好的話，都準備好入錄音室，不過太耐冇唱歌，都有少少驚。」
| (攝影：陳慧安) | | |
| | | |
來源 source: http://s.nextmedia.com
|
鍾意就快D Share啦！
|
|
|
