(新增影片)蘇永康（阿公）噚晚就喺灣仔嘅六國酒店，為佢囝囝Jazz搞百日宴，唔少圈中好友都有到場，好似黃子華、超儀夫婦、容祖兒、梁漢文、上山詩鈉同囡囡、胡杏兒夫婦、許志安、張衞健、杜德偉、狄波拉、蘇志威、蔡一傑等等都有去到。近晚上十一點嘅時候，阿公就抱住一張油畫相出嚟，相入面係1967阿公媽媽抱住阿公，同埋2017年阿公媽媽抱住孫仔。阿公落到嚟笑得好開心，又派紅雞蛋同利是。阿公就話：「張相就係相隔49年，係媽媽喺同一個地方，一次抱住我，一次抱住Jazz，因為以前爸爸都喺呢度做嘢，今晚擺咗十一圍，大家都好開心，呢個百日宴最主要紀念爸爸，因為佢以為喺警察會做樂隊，當年佢唔想收片，所以就做銀樂隊，又有警隊福利，但當年一份工唔夠，所以夜晚佢就喺呢間酒店做樂隊。」講到囝囝今日咩情況，阿公就話：「子華今日好勁，因為佢係契爺，角色好重要，阿仔一喊，只要子華抱就唔喊，我懷疑佢每星期都有一日，去母親的抉擇度做。」其實今日唔係真正嘅一百日，係一百零五日，因為之前太太去咗公幹，所以遲咗五日先搞，仲話好多時阿公自己照顧BB，因為工人都要休息。過咗一陣，子華就同埋一大班人出嚟，講到阿公大讚佢，子華就講笑話：「其實o依家我一得閒就去做陪月。」子華就送孭帶畀阿公，因為契仔已經16磅重，都係時候要用孭帶，子華仲話好渴望成日去阿公屋企照顧契仔。祖兒走嘅時候就問到師兄做咩唔嚟，佢就話師兄唔喺香港。
來源 source: http://s.nextmedia.com
|
鍾意就快D Share啦！
|
|
|
