「今日雞叫以先，你要三次不認我。」彼得三次不認主。2017年版本。係「鷹眼」謝洛美維納（Jeremy Renner）屋企人問婷婷：「點解你唔認咁笨？」唔認乜嘢？唔認同鷹眼拍拖囉。但呢個係婷婷單方面引述。前文係，婷婷每次出席活動，都大方回應佢同鷹眼嘅感情發展，以默認或暗示讓大家知道，Jennifer Tse係完全掌握鷹眼行蹤，關係儼如男女朋友。但上月底婷婷默認同一日，有外國網站卻稱鷹眼同女友買訂婚戒……咁啱婷婷喺香港出席活動，傳媒馬上追問，婷婷就話：「佢唔係我男友。」吓？婷婷即再補充：「我哋冇真正拍拖，我冇認過，你哋『躓』畀我！」(新聞連結； http://bit.ly/2swawSQ )兩日之後，婷婷又再出席活動，表示有同鷹眼聯絡講番呢件事，並引述男方家人話佢傻豬、問佢點解唔認同鷹眼一齊。冇錯，婷婷一直都話同鷹眼、佢個女、以至全家都好熟。既然婷婷話鷹眼笑佢傻，咁換言之即係——係拍拖啦，點知婷婷又兜圈：「同鷹眼嘅關係冇改變。」咁點解唔認呢？「其實英文有好多種，見到隻狗可以係I love you，小朋友同好友都可以係I love you，唔會無啦啦未得對方承認之下，去認呢個男友身份同關係！」即係鷹眼未同佢正式講I love you？(新聞連結： http://bit.ly/2uLFFDF )香港時間本月27日，鷹眼同「紅女巫」伊莉莎伯奧遜（Elizabeth Olsen）新片《Wind River》喺洛杉磯舉行首映禮，鷹眼攬實伊莉莎伯鼻貼面，但原來婷婷都有去首映，件事就變成「低調撐男友」啦。呢段橫跨港美嘅愛情故事，由去年12月男方來港出席活動開始，大家一直都係聽婷婷嘅版本，咁鷹眼呢？外國傳媒又冇問……鷹眼自己ig又唔貼同婷婷合照，咁，好難搞喎……直至《Wind River》開始宣傳造勢———日前鷹眼接受《蘋果》特約記者Lilly Lui專訪，暢談拍《Wind River》難忘經歷，本報亦把握機會向鷹眼求證：「談到外地，你最近也到過香港，有傳聞你和謝婷婷約會，是否事實呢？」鷹眼說：「我當天才認識Jen（婷婷Jennifer)，騎着Harley電單車遊香港嘛！不是，我們只是朋友(No, we are just friends)我遲些也會到澳門出席澳門電影節的大使，我拿了一個十年的中國簽證，亞洲的觀眾們會常見到我」明白了…所以婷婷之前說，鷹眼今年年底會嚟香港，因為鷹眼會出席澳門於12月8號至14號舉行嘅電影節。婷婷今年情人節受訪時亦曾表示，明年情人節會同鷹眼一齊過…本報就鷹眼'No, we are just friends'回應，向婷婷求證，婷婷透過助手回覆表示身在LA：'I'm here in LA for class And he asked me to go to the premiere, the movie was amazing.'(我仍身在洛杉磯上堂，是他邀請我出席首映，這部戲很令人驚嘆！)問到鷹眼交代與她只是朋友關係，婷婷並無特別回覆。
| 《蘋果》特約記者Lilly Lui洛杉磯直擊 | | |
| | |
|
鍾意就快D Share啦！
|
|
|