張繼聰及謝安琪（Kay）為囡囡張靖（Karina）在主題樂園酒店舉行百日宴，約7時45分左右，兩公婆恩愛現身接受訪問，已40歲的Kay身穿白色喱士連身裙，見她收身尚算成功，但可見上圍依然豐富，谷出3吋事業線，她亦穿上4、5吋高跟鞋，她表示是之前買落。
用錢都買唔到
張氏伉儷先多謝記者到來，表示邀請了300名賓客，多謝他們前來。阿聰感謝Kay：「自己一直忙於工作，今日所有策劃、設計都係老婆同planner諗，主題係嘉年華，希望大家玩得開開心心，裏面好似遊樂場咁。（哥哥張瞻玩到失晒控？）係呀。」Kay即搶答：「最緊要佢頭髮keep到。」阿聰亦笑言好彩兒子的西裝褸仲喺度，他亦透露場入面有得整T恤。問到花費幾多錢？阿聰謂：「好多錢買唔到所有嘢，今次都有好多朋友幫手。」
Kay表示見到好多朋友在入面玩好開心，講到她收身得好快，她謂笑言並不快，自己有做運動及舉重、舉啞鈴等，並謂受大隻的阿聰影響：「身邊有人鞭策自己，自己唔可以太遲起步。（想操到有馬甲線？）呢條線離我頗遠。（你有事業線咪得？）哈哈！我嘅事業已經擺埋一邊，為咗家庭都犧牲好多。」問到幾時復出？她坦言未有打算：「依家想將啲時間放喺小朋友到，以家庭為先，囡囡都係得幾個月，雖然囝囝10歲，但都係要傾偈嘅階段。」
仲餵緊人奶
問到囝囝可有呷醋？Kay表示沒有：「反而佢成日都錫妹妹，可能同妹妹年紀差好遠，佢依家放暑假，換尿片時佢仲幫手扔嘢，餵人奶時佢又幫手冚住。(仲餵緊人奶？)係呀，希望可以餵多一年。」她又講笑謂冇可能餵到21歲。另外，百日宴回禮禮物是一盒粉紅色、包裝別致的朱古力。
想個女大個自由發展
阿聰亦謂現時已諗囡囡讀中學、大學時要先發制人，笑言：「起碼哥哥第一日接放學，第二日到我接力，我要操到好似苗僑偉咁fit，走出嚟接個囡放學。」他又兜圈讚老婆識揀他：「不過我唔係阻止佢拍拖，但希望佢好似外父、外母生個女咁有眼光。（你自信心爆棚？）最緊要有自知之明。」問到可有為囡囡成立基金？Kay表示為囡囡已有一套完善計劃，阿聰謂希望囡囡自由發展，雖然學習重要，但心靈富足最緊要。Kay亦希望囡囡可以與哥哥讀同一間學校，因為方便接送。
問到Kay可有品牌找她出席活動？她承認有：「我一一答謝佢哋，但都推哂，希望時間重心可以陪住仔女，專注家庭先，暫時唔諗咁多。（見財化水？）損失有一定數字，不過我唔會咁算帳，只要睇住小朋友開心就乜都值得。」
|
鍾意就快D Share啦！
|
|
|
