尋日先結婚，咁快想食軟飯？
昨日結婚的孫耀威（Eric）到尖沙咀出席美容活動，戴上黑超的他自言酒醉未醒，又自爆平時要老婆陳美詩（Macy）逼才做Facial。受訪時，他笑言要語無倫次地做訪問：「我好渣，尋晚（29日）12點幾已經畀朋友隊冧咗，佢哋就盡興到天光，朋友一批一批咁嚟，目標都係想隊冧我，我唔知係攰定點，12點幾扮醉，一扮就真係醉咗。」他透露太太酒量很好，與一班姊妹飲酒傾偈到天光。
冇洞房嗌嘥咗
說到訂了酒店套房的大床，他笑言：「我一個醉咗，大字咁瞓喺度，死咗咁，朋友影晒相。嘥咗，冇洞房！」至於這麼快就開工，他坦言因為要養太太：「要努力，依家責任感大咗，有個家庭要做男人嘅本分，希望畀到最好嘅佢。（佢唔使做？）佢好奇怪，結咗婚反而事業為重，好多大計。」
老婆做女新人
Eric指Macy即將重返樂壇：「佢係2017年女新人，幾廿歲先嚟做女新人，新歌已經差唔多做好，我希望佢成功，我可以食吓軟飯。（怕唔怕佢辛苦？）冇，佢好鍾意做演藝，鍾意唱歌、拍戲，個個都催我哋生BB，但係夜晚做啫，白天都可以工作。」他認為最重要對方開心，太太做甚麼都支持。問到太太可會太操勞？他說Macy只要做喜歡的事就會愈做愈精神：「話唔定將來合唱，不過都係唔好，好老土。（寫歌畀佢？）有可能，如果佢想繼續做，我可以寫畀佢。（你要快啲生B？）呢度有冇壯陽？會努力。」他覺得現今不少女士都能兼顧事業和家庭，太太不一定要洗衫煮飯，又笑稱對方沒煮過飯給自己吃，感到很慘。
來源 source: http://hk.on.cc
|
鍾意就快D Share啦！
|
|
|
