資深音樂人林慕德（Mahmood）與蘇永康多年前被指因財反目，隨着Mahmood準備於8月初假會展舉行作品欣賞會，因而傳聞再被翻炒。與嘉賓J.Arie（雷深如）受訪時，Mahmood直言為蘇永康首張唱片幾乎破產，卻被誤會「玩嘢」，令他自責做人與做生意均十分失敗。
重提與蘇永康反目一事，Mahmood強調與錢銀無關，只是當時自己未夠成熟，又自爆曾經得罪寶麗金：「我乜嘢都唔鍾意，啲人覺得我好似玩嘢。我有啲唔開心，點解我冇機會做到啲好似寶麗金咁叻嘅嘢？好遺憾冇乜機會同張學友合作。」當時為了製作一張媲美張學友水平的專輯，Mahmood選擇了當年只得19歲的蘇永康：「佢把聲幾靚，但合作嗰時出咗事，我做嘢唔講錢，所以個預算愈做愈大。佢唱歌有天份，但咬字欠咗啲嘢。我冇乜系統咁叫佢不停練，原意係好似葉問叫李小龍訓練咁，但我冇解釋，淨係叫佢唱。佢當時細個所以唔開心，我又唔開心，變咗大家有個誤會，仲加深咗。」
二人為首張大碟《失眠》出現很多練習和選曲上的爭拗，令Mahmood心灰意冷：「原來做唱片咁慘，當時我已經失敗咗，得罪晒我啲客。我本來做音樂創作公司，梗係愈多客愈好，但忽然做咗唱片公司，就冇晒唱片公司客。同埋我用咗太多心機、時間做蘇永康隻碟，忽略晒我啲廣告客，《失眠》呢隻碟累到我破產咁滯！但係人哋唔會咁睇，淨係話『你拖我咁耐』、『你玩我呀』、『點解第二隻碟做得咁差？』佢哋冇睇到我已經冇晒心機、冇晒錢、冇晒面！我做咗隻好似張學友咁好嘅唱片，咁又點呢？我藝術上成功咗，但做人同做生意失敗咗。」
尊稱Mahmood為林老師的J.Arie大讚對方的作品出色，很開心有機會成為作品欣賞會的嘉賓。提到家人為她工作繁忙而心痛，她則樂在其中：「我做完成日嘢返屋企，唔係好出聲，又冇乜表情，佢哋就覺得我有好多工作上嘅嘢唔開心，其實我只係做咗成日訪問或者唱咗成日歌，想把聲唞吓，但我係享受嘅。」問到樂手男友是否同樣心痛？她即避談指很多朋友都心痛，還勸戒她正正經經做一份工，她笑說：「我呢份唔正經咩？我都係好認真做一樣我鍾意同有熱情嘅事。啲朋友呻成日唔開心同要OT，至少我OT得開心，唔介意日日都OT！」她解釋自己比較低調，不想大家只留意其戀情：「我平時出街已經戴晒口罩，擺明唔想畀人見到。呢啲係花邊嘢，拍拖好正常啫。作為歌手我好畀心機，日日都想做啲新嘅嘢，拍拖係好有娛樂性，但希望大家唔好忽略我嘅努力。」
林慕德髮型及化妝：Nikki Sun @ MAKE UP FOR EVER ACADEMY HK
J.Arie髮型：Kenki @ Queen's Private I
J.Arie化妝：Pinky @ Jessicachan make-up
場地：圃鍋
----------------------
東網已全面支援360影片及相片，讓你全方位睇盡新聞大事，恍如置身現場，立即登入東網360網頁： http://on.cc/360/
如仍未更新東網App，請按此連結收睇360影片： https://goo.gl/nRZNmL
|
鍾意就快D Share啦！
|
|
|
