被喻為MK POP始祖——E-kids成員阮民安（Tommy），早排啱啱去咗旺角拍新歌MV，日前又再現身油尖旺區搭港鐵，點知現年37歲嘅Tommy仔，就係因為星期一下午放工時間搭港鐵坐優先座，湊巧附近又有一個長者冇位坐，被讀者李小姐透過「爆相爆片」報料，指Tommy不讓坐。李小姐接受電話訪問時憶述：「嗰日係星期一，大約下晝5點幾放工時間，我喺油麻地站上車見到佢坐喺關愛座。當時車廂裏面都幾多人，附近又有個白頭髮嘅婆婆，佢都冇企身讓座，我唔清楚佢係扮定乜，不停喺度玩電話，但佢又戴咗黑超，都唔知係咪望到手機畫面。」李小姐仲話Tommy仔着咗對Vans，但好似唔啱size，將對鞋着到當拖鞋。對於被讀者指摘霸優先座，Tommy仔接受電話訪問表示：「我呢啲貼地歌手絕對會搭地鐵，因為我係窮歌手，相信大家唔會覺得Tommy仔有錢，可能大明星搭公共交通工具係親民，我呢啲梗係兜踎其實唔係咁樣，全香港過海有乜快過地鐵啦，呢啲繁忙時間。」「至於關愛座，雖然我哋呢啲喺老友記心目中俗稱廢青，但我哋都會有唔舒服時候。」Tommy仔稱，當日早上因為肚屙，已感不適，故才會搵位坐：「關愛座其實都係想畀啲有需要朋友，除咗老友記之外，咁老友記梗係大晒啦，梗係覺得畫咗公仔就係佢哋坐，但我哋呢啲廢青都有唔舒服時候。「至於附近有白頭髮婆婆，我呢啲一分一秒都要諗營運工作，比較緊張email、WhatsApp，未必留意到，下次見到老友記喺度，我無論嘔血又好，肚屙又好，都會立刻起身讓座，唔好意思。」至於將Vans着到變拖鞋，佢就話：「主要係對鞋買細咗，不如踩踭啦，又唔想嘥咗佢！唔知係咪年紀越大，連隻腳都大埋，下次買鞋買大半碼至得，可能有啲人認為係fashion都唔定，多謝大家關心我將Vans變拖鞋。」相關文章：
隔牆有耳：譚耀宗坐關愛座捱轟
http://bit.ly/2tiLjdW
| (讀者提供圖片) | | |
| | | |
|
鍾意就快D Share啦！
|
|
|