動漫節埋牙！林泳淘包上頸蝕章 麥美恩玩嘢贏碌髀
無綫藝人林泳淘及王卓淇昨日以大使身份出席動漫電玩節開幕禮，更大玩Cosplay娛賓，可惜造型密實兼封胸，略嫌失色！而麥美恩（Mayanne）及李佳芯則在另一動漫活動上嘈爆打機，全程High爆的Mayanne更興奮跳躍，搞到露白底及白滑大髀，奇招得逞，成為全日焦點！
《第19屆香港動漫電玩節》昨日在會展開鑼，會場內有大批索爆Game Girl及Cosplay愛好者，當中不乏酥胸半露的性感女神，可說是宅男天堂！打頭陣有TVB藝人林泳淘及王卓淇以大使身份玩Cosplay，可惜造型睇頭欠奉。卓淇扮演善良仙女艾娜，只露出半截美腿，上身包到冚；而扮演暗黑女神的泳淘亦只是騷小蠻腰，惟有不停轉甫士搶分。
李佳芯 嗌到拆天
而「是非精」麥美恩（Mayanne）及李佳芯（Ali）身穿便服出席另一活動，在台上打機時，貫徹是非精嘈爆形象，嗌到o依嘩鬼叫！全程High爆的Mayanne，玩手腳協調遊戲時被要求舉完右腳再舉左腳，身穿裙子的她非常投入，興奮跳起，結果不慎露出白底，吸睛程度比一眾Cosplay玩家更高！
Mayanne與Ali受訪時笑言已比平時溫柔，只使出七成功力，Ali說：「打機都係為開心，講出嚟，可以同隔籬個人有互動。我一個人嗰陣鍾意打喪屍Game，都會驚到大叫！（男友有冇嫌你嘈？）我好少同人打機嘅。」Mayanne則笑說：「冇男仔嫌我哋嘈喎！有氣氛呀！佢哋都想有啲衝擊嘅聲音，大家個心有冇卜卜咁跳呀？」此言一出即嚇親Ali，並讚Mayanne這日格外嬌嗲，問是否想行台妹撒嬌路線？Mayanne笑說：「唔敢當，我都係參考Ali，太耐冇見，見到佢忍唔住對佢撒嬌！」她又表示平日愛玩足球及冰上曲棍球遊戲，而最愛的是偷車、打爆玻璃遊戲，可抒發暴力情緒：「當係發洩，可以脫離現實一下。」
王卓淇 愛打機男
至於泳淘及卓淇亦承認造型密實，望以英氣加分，卓淇說：「我都可以（性感）o架！但要尊重設計師，今年係我第一年嚟動漫，好好玩！」問到之前有否試過Cosplay？卓淇表示13歲時扮過百變小櫻：「因為我朋友好鍾意套卡通，逼我扮，我就扮得比較Hea，佢仲重現漫畫撞低小櫻一幕，搞到我跌落地，動漫人世界真係好投入。」至於連續第二年Cosplay的泳淘，扮過美少女戰士及反串男角，更自誇扮男仔好靚仔。兩女均自認是打機迷，擇偶也要投其所好，卓淇說：「男友一定要打機，仲有係咁讚我打得叻，最好一齊打，如果本身唔識但特登為我學，都係一種愛。」
文：影視組
|
鍾意就快D Share啦！
|
|
|
