掃呢頁CODE去手機

2017年8月24日 星期四

戴訂婚戒指 江若琳:我哋認定咗對方 [壹週刊 - 1433] __,江若琳,M1,

拍拖唔夠一年江若琳同男友Oscar拍拖唔夠一年,經常放閃,兩人手上更已戴上訂婚戒指。探熱針戴訂婚戒指 江若琳:我哋認定咗對方自14年起,與舊公司寰宇打 ...


拍拖唔夠一年

江若琳同男友 Oscar拍拖唔夠一年,經常放閃,兩人手上更已戴上訂婚戒指。

探熱針

戴訂婚戒指 江若琳:我哋認定咗對方

自 14年起,與舊公司寰宇打官司,至今仍要跑數還龐大律師費的江若琳,一路艱難。但幸福終於找上門,與相識十年的上海生煎皇老闆 Oscar(蕭潤邦)撻着,三十歲的她首次嘗到被人愛錫的滋味。拍拖唔夠一年,二人已秘密訂婚,男友更計劃在外地舉行婚禮,江若琳冧爆直認:「我哋互相認定咗對方!」

四月已訂婚

有十年友誼基礎,雖然今年初才撻着,但二人已視對方為終身伴侶, Oscar更在手腕紋上女友英文名縮寫「 E」字的愛的紋身。江若琳大讚男友踏實、孝順、人品好,笑稱突然撻着時如被雷擊,緣分真的很奇怪!

本刊發現,二人在四月公開戀情時,已戴上訂婚戒指,認定對方。江若琳直認:「哈哈,你哋係首個媒體發現!只係普通情侶戒指啫,佢講咗準備買戒指,佢份人守唔住秘密。」

原來當日決將情侶關係浮面時,已到訂婚地步,夠晒穩陣。

問到她手上的訂婚戒,江若琳笑晒口:「你哋係第一間傳媒發現……」

二人四月在網上公開戀情,當時男方已說他是江若琳的岸。

兩人經常糖黐豆,據知想急娶江若琳的 Oscar,四圍向朋友問婚禮意見。

早前 Oscar的上海生煎包再開分店,謝安琪都入股投資, Oscar開晒口話努力儲緊老婆本。

有個錫到自己燶的男人,狀態大勇的江若琳專心為九月個唱準備。

江若琳說男友雖然唔浪漫,連買定情戒指都事先張揚,但打動她的,是滿分的細心。

計劃出埠行禮

據悉 Oscar周圍問朋友在外埠搞婚禮詳情,並首選日本為婚禮地點,求證江若琳時,她笑笑口話:「大家係有講過呢樣嘢,佢會等我開埋演唱會先,我又唔係好急,世俗嘅儀式唔使咁在意。入行咁耐,第一次咁公開拍拖,因為我搵到啱嘅人,大家都認定對方,希望行到最後。」

Oscar有幾家生煎包店,有給股份江若琳嗎?她說:「生意啲嘢我唔插手。」至於是否已開聯名戶口一齊儲錢買樓,她說:「呢個係秘密!」

江若琳坦言從前渴望轟烈愛情,希望男友常給她驚喜。但年紀漸長,發覺自己需要的,是生病時,對方會揸車遊勻港九新界搵醫生;當她吃東西時,對方會第一時間衝去攞圍巾,這些生活細節 Oscar一一做到。

10年在九展開處女個唱,當時江若琳大解放,大跳辣舞。

早前她約埋同是 07年出道的歌手食飯聚會。

當日出道走玉女路線,之後忽然轉硬朗形象拍首次孭飛電影《高舉愛》。

跟香港經理人有官司糾紛,江若琳近年北上發展,捱出成績,在內地劇《花木蘭》及電影《愛在星空下》當女一。

踎低為她綁鞋帶打動

Oscar有次在街上踎低幫女友綁鞋帶,令江若琳感動到喊,「當時條街人來人往,我見到好想喊,一對伴侶最好嘅事就係互相好好照顧對方。拍咗咁多次拖,冇人咁對我做過,比收到九十九枝玫瑰更浪漫!」她說。

曾被嘲是地獄廚神,但因為 Oscar鼓勵,她變成醉心下廚。「佢真係好鍾意食我啲嘢,我會買好多藥材整肉骨茶俾佢、整冬蔭功、煲湯,呢啲就係(愛情)力量。」

樂壇低迷堅持回歸 好掛住歌手身份

近年返內地打江山的江若琳,幾經辛苦建立成績,當上內地劇及電影女一。但近月她忽然放低在強國掘金機會,選擇回歸做別人眼中「冇前途冇錢賺」的歌手,並於九月在九展舉行兩場入行十周年演唱會,到底咩玩法!

江若琳說:「身邊朋友都唔明我點解放棄晒一年嘅成績,返香港出唱片,個個都話市道低迷又賺唔到錢。但我真係好掛住歌手呢個身份,尤其喺我好孤單嘅日子,我一起身就聽住歌,直至去到片場開工,音樂治療咗我嘅難過,所以希望用番小小嘅力量,出碟唱勵志歌,將自己故事放晒喺歌入面鼓勵人。」

07年以歌手身份正式出道的江若琳,同期有周柏豪、鍾舒漫、陳柏宇等。 10年她在九展舉行一場處女個唱,當時走玉女形象的她忽然在個唱大解放,跳性感辣舞。

對女友相當着緊的 Oscar,幫江若琳新歌填詞兼做埋唱片監製,又碌人情咭搵細 So及其他監製幫拖,廿四孝男友人辦。

盲足九年

遇上真愛 Oscar,江若琳才罕有高調晒愛。其實入行十年,江若琳緋聞不少,不過她自嘲:「以前成日俾人話我盲。」

羅仲謙

08年,出道不久的她與羅仲謙合作電影《愛鬥大》時傳撻着,但兩人堅稱只是緋聞。

吳卓羲

同年她跟吳卓羲合作電視劇《學警狙擊》,有指飾演情侶的他們戲假情真,但兩人例牌否認。

阮民安

昔日不愛公開戀情的江若琳, 10年卻被 E-Kids「小強」阮民安( Tommy)暗示與她有過兩年地下情,但因自己形象負面,怕連累女友才提出分手。

曹雲金

16年江若琳在內地被拍到與當紅相聲演員曹雲金當街親熱,事後她大方承認戀情,不過有指男方脾氣大,二人未夠半年就宣布玩完。

撰文、攝影、攝錄:娛樂組


鍾意就快D Share啦!