「其實依家識啲新朋友，佢哋都有試問我可唔可以即場表演一字馬或拱橋，我回答說，你先做一個給我看看，如果比我做得好，我就做給你看；如果沒我做得好，你就保持這個姿勢30分鐘不許起來。當然，至今還沒有一個人應戰啊！」身在北京的甘肅政協彭丹，日前接受《蘋果》獨家專訪時，咁樣講。專訪開始前，先介紹一下，彭丹姐姐是誰。94年曾有一篇專訪，主角是彭丹，她說，她的英文名叫戴安娜。那時彭丹，在香港仍然寂寂無名。生於湖南長沙，根正苗紅。父親是打籃球，母親是國營電子廠經理。彭丹8歲被國家選上北京學舞，畢業於北京舞蹈學校，更曾於中央芭蕾舞跳舞四年。明明家裡沒有一個是跳舞的，彭丹也不知道哪來遺傳跳舞細胞。91年憑獎學金赴美繼續深造，彭丹一個華麗轉身去了選美，三次皆摘冠。後來入了娛圈，當時嘉禾開拍一部動作電影，想邀彭丹任女主角，當時彭丹自信心滿滿的說，憑她的跳舞底子，若要她做楊紫瓊第二，冇問題。但最後彭丹沒有做成「楊紫瓊第二」，她去了做「波神」，然後做製片人、導演，在已經沒有多大市場的情況下拍攝多部紅色電影(你睇《建軍大業》？)再戲劇性的成為甘肅省政協。點解湖南長沙人會走咗去甘肅做政協？那時彭丹答得很妙：「不是我選擇了甘肅，是甘肅選擇了我。」主要係因為當時中國致公黨中央提名佢，甘肅省政協委員會審議同意。【連男朋友都未有
女神丹丹：結咗婚我唔會再做嘢】
重返大陸生活已8年，年屆44歲的彭丹，36F「波神」依然彈不虛發。今時今日她再接受《蘋果》專訪，絕招芭蕾舞、「E字馬」（一字馬）及「拱巢」（拱橋）統統唔使諗。唔會再即場示範，但可以講。問彭丹：「以你現在的體格，可否做一字馬或者轉這麼多個圈？」氣定神閒的彭丹說：「這是沒有問題的，我都堅持鍛鍊。」其招牌式半鹹半淡廣東話搭普通話仲Keep住。以前成日見彭丹公開示範一字馬與拱橋，近年就好少見到，是年紀大做唔到，定係其他原因？彭丹笑說：「我以前公開示範，都係為做慈善籌款表演或者拍戲，而媒體採訪我時，一般係因為我身上著住跳舞衫，啱啱跳完舞，咁落台後佢哋有呢個要求，我可以示範下，但一般情況唔會無啦啦做一字馬、拱橋呢啲動作出嚟。」其實依家大陸唔少電視台或媒體搵彭丹做訪問，都會請佢示範一下，佢都極少答應。「唔同年紀做唔同嘅事，細個好鍾意跳舞，咁做一個舞蹈動作，比如拱橋、一字馬係好正常，依家無端端做同咁嘅動作出嚟好奇怪。除非我係有跳舞表演。」「講真，做一字馬呢啲動作對我冇任何難度，我一直都有Keep住做運動同跳舞，所以身手一直冇生疏。」【搬返香港？
波神丹丹：香港仲有唔少粉絲】
彭丹堅稱冇男友，仲話狗仔隊神通廣大，如果有又點會影唔到。也是。香港傳媒已經很久沒有在此地捕獲過彭丹身影。會否考慮在香港定居？彭丹說：「應該唔會不過我知道香港仲有唔少粉絲支持我，我喺網上有注意到，好多謝香港粉絲一直以來對我嘅支持。雖然依家我嘅發展基地都喺北京，但我都經常返嚟香港，不過每次都係短留一、兩日就走，大家先唔知啫！」彭丹一直視香港為第二故鄉，所以人不在港，也經常關心這個城市，當她發現這幾年中港兩地人越來越多矛盾，她認為是兩地文化差異，彼此之間欠缺溝通才會將情況變得惡劣，所以她想以文化角度，開拍一部以香港與內地人為背景的電視劇或電影，希望從而可以加深兩地人的互相了解，這部戲她想自己當導演，劇本亦會由自己寫。【「我想擔當一個橋樑」
政協丹丹：最主要還是一國】
由大陸旅客同導遊爆衝突，到小童喺旺角鬧市隨街小便等，呢啲都係激化兩地矛盾嘅事例，彭丹又點睇呢？佢話：「其實都係因為內地人對香港人不理解，香港人回歸前係接受西方教育，回歸祖國已經有20年，應該將文化都回歸，唔係只係喺經濟上回歸祖國。「我作為文化工作者，我想擔當一個橋樑，我覺得內地人對香港人好有感情，香港人對大陸人一樣有感情，只係過去因誤會同缺乏溝通，一個兩制，最主要還是一國，然後才兩制，但過去我們過份強調兩制，忘記了一國就會出現問題，所以兩岸溝通很重要。」近幾年彭丹的公司業績相當不錯，她已經由一個演員變成製作人和導演，單是公司團隊就有6、70人跟佢搵食。彭丹話：「以前單純做演員，唔使理咁多，依家做埋投資人，承擔壓力好大，點都要計數同了解市場，So far公司都冇蝕錢仲有錢賺。」
|
鍾意就快D Share啦！
|
|
|