辣招一出肯定係頭條，但呢期冇嘢紅得過呢隻小辣椒，佢咪就係Chili麥紫莉囉。麥紫莉由寂寂無聞嘅𡃁模，一夜間搞到全城熱血沸騰，AV兩個字認真威力無窮。香港首個少女遠征日本拍成人色情片，莫講話真做，以前噏出嚟人哋都話你白癡，G奶紫莉有乜辦法唔出名先得？有句說話叫一入侯門深似海，我Nuts哥就話一拍AV盡感慨！講真紫莉質素唔算標青，AV界入面肯剝、肯搏、肯腿張開大有人在，畀人識穿螺肉充鮑魚，分分鐘一碟就完，AV呢條不歸路，堅唔係人人玩得起。
40萬打真軍 港男食花生
麥紫莉話要養家，畀有病嘅媽咪過較好嘅生活，自稱有人畀80萬包佢都唔制，寧願收40萬打真軍拍兩套AV 。佢話拍成人片都係演出嘅一種，樂意接受挑戰，仲話工作：「同平時搞嘢差唔多，只係多咗幾部攝錄機之嘛。」呢番豪言壯語，認真後生可畏，Nuts哥有乜辦法唔聽到嚇一跳，得啖笑？
唔知係依家啲90後真係咁夠薑，定係經理人喺背後教佢講對白。如果係前者，堅要搵人為麥紫莉由頭到腳嚟個再教育。佢AV老老老老前輩飯島愛曾經講過：「只要拍過AV，那裏就會被視為不乾淨。」可能紫莉覺得老套，但喺表面開放，內裏依然保守到不得了嘅亞洲地區，呢句說話絕對係多數人嘅心聲！就講番香港人，就算近年對AV女優接受程度提高咗，但十個人入面有五個唔撐你，對你兜口兜面講啲十級難聽、衰過粗口嘅人身攻擊，你肯定到時撐得住？
紅唔起霉過腐乳
雖然有日本女優大紅大紫，蒼井空喺內地堅到被網友尊稱為「老師」、波多野結衣喺台灣仲出埋悠遊卡、三上悠亞「下海」後仲紅過做女團成員嗰陣，但呢啲都係一小撮例子。最重要係佢哋搵到食，唔代表唔使承受千千萬萬道德人士嘅閒言閒語！一個唔好彩，紅唔起霉過腐乳，雙重打擊之下，到時就賤過地底泥，唔少女優話過，拍過AV根本融入唔到社會，要過最低下階層嘅痛苦生活。
唔少AV達人，都曾經為紫莉呢次壯舉進行分析，話佢會因工作證問題而拍唔成，亦認為日本方面對AV女優要求嚴格，未經受訓嘅佢，根本冇可能八月尾開到工。但麥紫莉就話日本公司方面已搭通天地線，發行唔使擔心，又進行緊全天候特訓，學緊日文方便溝通之外，仲學埋瑜伽，拍嗰陣可以做到更多唔同嘅姿勢咁話。紫莉講到似層層，睇嚟都「難免一戰」，但我就寧願呢個只係個完美宣傳假局。紫莉憑AV兩字，宣傳目的已達，仲盛傳收咗過百萬接廣告添，就算做衰女反口唔拍，跟手行性感都肯定搵到餐晏仔啦。
|
鍾意就快D Share啦！
|
|
|
