平日收收埋埋，原來盧淑儀身材仲 keep得唔錯，上圍都仲好有料到，一啲都唔似生過兩個小朋友。
娛頭
激罕 李克勤禁老婆再著泳衣 盧淑儀作反解放三點式
92年盧淑儀成為三料港姐冠軍，隨即被李克勤私有化，封盤退出娛樂圈，當年選美時索爆身材自此密封，想睇唔容易！而克勤亦講到明當年老婆著泳衣選美，已經蝕底咗一次，唔想老婆再著泳衣示人。
老公講明介意，極少在香港沙灘暢泳的李太就算下水，都刻意在比堅尼泳衣外包多件衫，唔會三點式示人，迎合老公保守作風。可惜百密一疏，克勤一家四口到淺水灣游水，在 35° C酷熱高溫下，原本著住件衫游水的李太，翳熱到連防線都放下，除去上衣落水透透氣， 25年後三點式再曝光。
生咗兩個， 44歲盧淑儀身材算係無乜走樣，連肚腩仔都無，加上肌膚雪白，堪稱港姐美魔女！
護花使者
同克勤愛情長跑十多年，○六年拉埋天窗，盧淑儀一直非常低調，絕少性感打扮，水著 look早已成絕響，不過上星期李太突然在 ig放了同老公在沙灘影的泳衣相，雖然張相冇乜嘢可睇到，連事業線都欠奉，但已經勁吸睛。
克勤之前曾公開講過，唔想老婆再著泳衣示人，他說：「喺幾十年前蝕咗一次，實不相瞞我好介意。」而盧淑儀亦好尊重丈夫的決定，每次去游水都收收埋埋，例必在三點式泳衣外加多件衫做保護罩，就算游得唔夠暢快都冇辦法。
紅日
日前《壹》仔發現，克勤和太太盧淑儀，帶埋兩個囝囝，一家四口到淺水灣游水曬太陽，克勤夫婦在沙灘搵到個樹蔭位，搭起一個小型帳幕，二人戴住情侶帽坐埋一邊，可能因為快將開騷，克勤大部分時間都坐喺沙灘上，攞住結他自彈自唱，李太喺隔籬一邊聽歌，間中會同老公傾吓偈。
而工人姐姐就負責同克勤兩個囝囝大小老闆在近海邊玩沙，兩公婆坐喺沙灘，視線亦遠距離望到實，非常緊張。
當日天文台發出酷熱天氣警告，沙灘氣溫超過三十五度，盧淑儀在帳幕內都被紅日曬到頂唔順，要行去海邊落水降溫，雖然著住三點式泳衣，但盧淑儀繼續外罩寬身外衣，只係喺近沙灘邊游，無耐又上岸同兩個仔玩一陣。
一個都不能少
不過，抵不住一輪暴曬，盧淑儀再次落水，但就算浸在水中都熱氣逼人，她開始將衫捲起，最初捲到去胸前露出部分比堅尼 top，過了一陣，她就將兩邊袖摺到去膊頭上，變成超小背心，為咗唔想性感示人，被其他泳客睇蝕，會令老公唔開心，她堅持一直著住衫游水！
其間「小老闆」 Rex鍾意玩沙，由工人姐姐陪住砌沙堆，「大老闆」 Ryan就落水同媽咪一齊游，盧淑儀更耐心教兒子浮水，兩母子黐住玩，十分開心，游咗一陣李太又上岸陪吓細仔 Rex。
陪仔玩完一輪，心繫老公的盧淑儀，就上番沙灘行去搵老公，只見李太邊行邊要用手扭件衫啲水，其實都幾狼狽，行近帳幕邊，又陪老公坐咗一輪，一心幾用的她絕對係廿四孝人妻兼人母，對他們三父子的愛，真係一個都不能少。
為陪家人克勤將 band房移師到沙灘練歌，但講完一個電話，克勤似乎要趕往工作，走前他先行去海邊，用手機幫太太和兒子影相，見他指指點點，三母子更攬住影，兩個仔都顯得好雀躍。
愛不釋手
被陽光暴曬，熱到幾乎中暑，亦令盧淑儀開始放下防線，最終決定作反連最後防線外衣都除埋透透氣，露出極少布三點式比堅尼游水，雖然已經四十四歲，但無經過後天加工的盧淑儀，估唔到仲 keep得好 fit，生咗兩個身上亦無多餘贅肉，肚腩仔都無乜，而且皮膚白滑，上圍都仲好有睇頭，難怪克勤多年來都愛不釋手。
游了大約半個鐘，盧淑儀上番沙灘已經急急要攞番件衫嚟著，再行番去帳幕度，搵個帳幕遮一遮，她才用毛巾火速抹乾個身，然後著番 T恤短褲，之後又同工人姐姐，夾手幫兩個囝囝抹身換衫，然後 call司機來接他們返家。
據知，克勤除了安排兩個兒子學琴培養音樂興趣，他亦有安排他們學游水，不過多數都只係在酒店泳池游，但由於兩個兒子愛玩沙，所以每逢放假都會去外地小島游水曬太陽，覺得冇咁易遇到香港人被人眼望望，但由於今年九月克勤要開騷，目前已經開始要進行彩排，所以今個暑假要減少外出，但係克勤幾忙都會抽時間陪仔，今次去沙灘玩遇着酷熱天氣，估唔到因此令李太三點式曝光！
運動高手
婚後專心相夫教子的盧淑儀，除了照顧一對寶貝仔外，同克勤一樣係一個運動迷，羽毛球、高爾夫球瓣瓣掂，一有時間就去做運動。
極速私有化
92年，盧淑儀以大熱姿態贏得港姐冠軍，與當年擔任表演嘉賓的李克勤認識，更火速被克勤追到手，從此退出娛樂圈，當年參選索樣大家一齊回味一下。
撰文：娛樂組
攝影：森美、瀚鍾、楊紫
|
鍾意就快D Share啦！
|
|
|
