好多藝人表面風光，但其實背後分分鐘孭起頭家，捱住上，如果遇上係家道中落，喺圈中捱騾仔，就更加係有苦自己知。好似近年愛情方面唔多得意嘅洪永城，亦係家道中落嘅受害人之一，話說洪母係台灣人，早年營商，家境殷實，家中排行第二嘅洪永城10歲起就被送去新西蘭留學，可惜經濟差，生意失敗，家道中落，佢屋企更越搬越落，由住半山搬到尖沙嘴同天后等地方，物業賣得嘅都賣。後來洪永城喺回港工作，由有線轉Now再轉去無綫，先叫做撈番起身價。仲有同樣喺大台努力緊嘅李施嬅，佢爸爸李光輝原本係做專門生產計數機嘅生意，家住寶松苑，同天后王菲做鄰居，絕對稱得上係有錢人家。可惜後來李光輝生意失敗，儘管李施嬅當時已經參選港姐，其父母亦已離異，但李施嬅嘅生活仍受影響，由玩票性質變成要搵錢養家。另一個圈中由富變窮嘅，仲有連詩雅，佢家底原本唔錯，有個做生意人嘅爸爸，仲有個喺加拿大領事館做繙譯員嘅媽媽，自細住九龍塘豪宅，讀名牌國際學校，點知父母離婚，爸爸更因生意失敗北上發展，連詩雅同阿媽被迫搬去劏房住。連詩雅初入行因為冇收入，又唔做得模特兒，搞到要每個星期6 x 10咁做baby gym導師，後來憑住《喜愛夜蒲》系列逐漸捱出頭。最勵志嘅例子，應該係生於電影世家嘅黎姿（現名馬黎珈而），佢係香港電影之父黎民偉嘅孫女，家中有唔少電影明星，原本家境不俗，可惜自黎姿嫲嫲過身後，其因患腦膜炎失聰嘅父親因不擅爭家產，導致家境變差，黎姿一家四口更由豪宅搬到東頭邨居住。黎姿年紀小小就已經出去做嘢兼職幫補家計，更因一次到父親工作地方探班，被許冠傑睇中，介紹佢去試鏡入行，亦因此踏上星途。黎姿入行以來，做齊歌影視三樓藝人，代表作更有《金枝慾孽》及《珠光寶氣》等。到2008年宣布全面退出娛樂圈，同年嫁畀商人馬廷強，婚後專心相夫教女，並抽時間幫其胞弟打理醫學美容公司生意，今年年初更成功喺創業板掛牌。
| （資料圖片） | | |
| | | |
| | | |
| | |
|
鍾意就快D Share啦！
|
|
|
