栢芝對霆鋒冇愛對王菲無恨！
張栢芝與謝霆鋒離婚六年，仍不斷有報道指栢芝對霆鋒未忘情，「鋒菲戀」更是她的心頭大石，前日栢芝在ig短片中多次提到8月8日，因該日亦是王菲的生日，結果被《蘋果日報》網上新聞扭曲成她咬住「鋒菲」唔放。面對種種傳聞，啞忍多時的栢芝決定發聲，並會發律師信追究！她更交代「鋒芝」關係，明言對霆鋒冇愛、對王菲冇恨！
栢芝與霆鋒於2011年8月中公布離婚，三年後霆鋒與舊愛王菲復合，當年栢芝已大方送上祝福，惟多年來不時有消息指她未放下霆鋒，對「鋒菲」復合更是耿耿於懷。前日栢芝在ig上載短片，五次提到8月8日兒子開學自己會開工，因當日剛巧是王菲生日，《蘋果日報》網上新聞則指栢芝「別有用心」，遂在短片中不斷提該日子。對於被解讀為「未忘情」，栢芝昨日接受本報獨家專訪，詳細剖白其內心世界！
記：記者
張：張栢芝
記：前日喺ig放短片，提到8月8日兒子返學便會開工，但被曲解成未能放下舊愛，你點睇？
張：仲有話我提咗五次嘛，真係好好笑，其實我唔係嬲亦冇唔開心，只係覺得《蘋果》今次嘅報道唔公平、係人身攻擊、歪曲事實同埋不受尊重，絕對同真相不符合，所以，我一定會採取法律行動！因為咁樣係誤導大家，傷害咗我，冇需要保留，我出道18年，好多無中生有嘅負面新聞，我都唔去回應，死貓吞到就吞，但今次隻貓太肥吞唔落！平時我都好少理啲負面報道，呢一次，好多關心我嘅朋友都戥我氣憤，所以必須講清楚。
唔想再食死貓
記：其實你點睇「鋒菲戀」？
張：佢哋當年第一日公布重新喺埋一齊，我已經送上無限祝福，唔會一、兩年之後無啦啦走去有怨恨放唔低，行李就放唔低！哈哈！可能有啲媒體喜歡炒作，當呢幾年我講嘅嘢係冇聽過，不斷重複又重複咁炒作，寫我未放低，但我由頭到尾都係祝福佢哋。
記：有冇恨王菲？
張：第一、我對男方（謝霆鋒）冇愛，第二、我對女方（指王菲）完全冇恨，有啲Fans畀某啲媒體誤導，話心痛我放唔低，我同佢哋講番，我都冇放唔低，我依家好快樂，活得好精彩！
記：睇到霆鋒同王菲一啲恩愛照片，真係一啲感覺都冇？
張：都冇愛冇關係，依家除咗囝囝嘅嘢，我哋係零聯絡，連見面都冇見過，點解會有感覺？我只會向佢哋送上無限祝福，其他感覺完全冇。
記：有冇恨霆鋒？
張：都冇感覺何來恨？你會唔會恨坐你隔籬飲茶嘅人？恨嘅都可能係嗰籠叉燒包或者件燒賣。
「我單身唔係冇人要」
記：日前網上流傳一張霆鋒同王菲去日本嘅相片，咁啱8月2日係Lucas生日，唔少網友都聯想到今年Lucas生日霆鋒有冇陪佢，事實係點呢？
張：網友言論我唔評論，佢哋有自由思想，至於霆鋒有冇陪個仔過生日，我不作回應，我只想我兩個仔有一個快樂開心嘅童年，冇任何唔好、負面嘅想法，大家可以睇到我嘅ig，佢哋到依家都係一個好純真、好開心嘅小朋友，呢樣嘢對我嚟講，係非常重要。其實今次做電話訪問，我係想捍衞我嘅尊嚴，食咗咁多年死貓，有啲媒體咁多年都不斷抹黑中傷我，講到我好似冇咗呢位男士（謝霆鋒）唔得，我保持單身咁多年，冇錯，呢個係我嘅選擇，我想將我啲時間畀晒我兩個仔，陪佢哋成長，唔想錯過佢哋嘅童年，但咁樣唔代表我冇人要，唔代表我唔可以得到幸福、冇權利去拍拖！唔係好似一啲偏激嘅媒體報道所講，我冇咗邊個唔得，今次清晰咁去交代清楚，係想大家唔好再有遐想，話我一直等待一個根本我唔想等待嘅人。
記：有傳聞霆鋒同王菲去日本旅行，王菲帶埋女兒李嫣同行。
張（笑言）：王菲去旅行帶埋個女，有咩問題？！佢（謝霆鋒）咁大個人，知自己點安排自己時間，希望佢哋喺日本玩得開心
「開ig同粉絲溝通」
栢芝清晰交代自己與霆鋒目前的關係以及對「鋒菲戀」的看法，是不希望再被不良媒體抹黑，而她開了ig戶口並不斷上載生活短片，是希望大家更了解「張栢芝」是個甚麼人？是否如外傳般喜怒無常，也許這是向抹黑她的媒體，一個最實在的回應！
記：最近點解愛上玩ig直播？
張：唔係愛上，係我懇求經理人好耐，想開ig同fb，講到經理人同我反面咁滯，佢知我一開就麻煩，因為會有一啲唔好嘅媒體，利用我啲短片嚟大做文章，但我嘅想法係，我知我好多Fans都好關懷我，但冇方法同我溝通，我好想同愛錫我嘅人分享我做媽咪嘅嘢、我喜歡嘅音樂，大家傾吓偈，平常咁生活。
記：有冇諗過將ig改為私人？
張：我唔明白點解有啲媒體可以去到咁盡，用咗我嘅片，仲要扭曲大做文章，但我唔覺得自己要改變嚟避開佢哋，我有我嘅生活，我係藝人都係打份工，搵餐飯食。
此外，張栢芝工作室亦發文指栢芝跟王菲不是情敵，對某些媒體不實報道已發律師信給對方，實行法律追究，並勸喻某些媒體不要繼續炒作，栢芝的生活不是為了他們。霆鋒方面對栢芝在專訪中指對他冇愛冇恨，不作回應，昨日他反而更新微博，指與運動鞋廣告商合作第16年，只談工作不談私事。對於霆鋒與一對兒子見面的安排，其經理人霍汶希說：「佢同栢芝係有共識，會作出時間安排。」
文：影視組
|
鍾意就快D Share啦！
|
|
|
