王敏德同馬詩慧嘅大女王曼喜（Kayla）向來言行大膽，早前喺Instagram大曬跪喺浴缸影嘅全裸背相，其實佢早喺去年已經勇敢宣佈出櫃，公開有外籍女友Lia，可惜兩人因為分隔異地，最終都係分手收場，難得Kayla極快收拾心情，火速就有新女伴。去年Kayla同Lia分手冇耐，已經被影到身邊有位中性打扮嘅女性密友，佢哋除咗被影到結伴睇演唱會時態度親䁥，仲經常攬腰密斟，之後再被發現拖手行跑馬地，但Kayla當時堅稱對方唔係新歡。不過，日前本報就影到Kayla同呢位中性打扮嘅女生密友，甜蜜蜜喺車廂擁吻，由中環到大坑整個車程都大玩「纏綿遊戲」，搞到的士司儀幾乎連倒後鏡都唔敢望，整個畫面更加似曾相識，似足大前年傅嘉莉喺車箱啜爆富商肥叔叔一樣。當晚10點幾，《蘋果》發現Kayla同女性密友喺中環歌賦街一間專賣創新口味雞蛋仔嘅甜品店Oddies入面，Kayla喺舖入面雖然同密友唔多交談，但心情就明顯靚爆，自己一個人喺度左搖右擺跳舞，隔咗大約半個鐘齊齊走人，2人踏出舖頭就有講有笑，Kayla仲主動捉實密友手臂行，一直行去路口截的士。唔知係咪上車咗車，車廂只有2人同埋司機叔叔，Kayla同密友都特別感到輕鬆，坐喺後座嘅2位唔止身貼身黐到實，Kayla密友更不時向她嘟嘴鍚臉，Kayla就非常小鳥依人咁挨住密友。Kayla呢位密友都幾健談，當晚上的士後，佢幾乎無停過講嘢，又數度轉身，臉對臉望住Kayla，笑晒講完嘢後就扛個頭埋去錫錫，由中環到大坑車程，除咗停燈時2人會即刻坐定定，行車期間2人都未停過sweet，Kayla密友更一度將她擁入懷。2人其後在大坑柏麗園落車，Kayla先落車開閘，密友則負責付車資。雖然該處是Kayla同父母入住嘅哋方，但其密友似乎同隔離鄰舍都好熟絡，有鄰居帶金毛尋回犬散步，佢亦第一時間走去打招呼及逗犬隻玩，直至見Kayla已經打開屋苑大閘門才急急轉身離開。
| 攝影：吳耀輝、孔志豪 | | |
| | | |
| | | |
| |
|
鍾意就快D Share啦！
|
|
|
