藝人袁文傑早前在無綫劇《不懂撒嬌的女人》中，飾演霸氣總裁「游生」而人氣急升，以45歲之齡成為新一代「師奶殺手」！主持、演戲均出色的他，回想入行多年隨遇而安，凡事做好本分，不應酬亦不強求，抱着「機會是你的總是你的」宗旨，終於默默耕耕捱出頭！
劇集《不懂撒嬌的女人》播出後，成為全城熱話，連帶當中的角色也備受關注。除了宣萱和林文龍的演出備受讚賞外，飾演霸氣總裁「游生」的袁文傑亦獲網民熱烈討論！「游生」每次出場也引起觀眾關注，對於上年剛簽約無綫，在因緣際遇下接拍了首部4K製作的重頭劇，袁文傑自覺幸運，坦言時機十分重要：「我事後先知，原來我係劇集中最後一個拍板決定嘅角色，如果我早幾個月簽約，可能已經加入咗其他劇組，遲幾個月劇集又已經開拍，所以時機真係好重要！」
回想起初接劇本，袁文傑指「游生」一角看似戲份不多，但每次出場也是劇集的關鍵時刻，影響劇情走向，因此他與監製傾劇本時亦格外留神：「監製同我講，劇集嘅人物關係圖最頂層嘅就係呢個角色，所有事都係佢造成，所以我好感恩同珍惜有呢次機會。」
18歲 入無綫藝訓班
身高1米80的袁文傑獲網民讚外表貴氣，甚有富二代風範！他聞言笑指十多歲便出社會工作，是工作經驗豐富的「富」：「我出嚟做嘢第一份工，係做錶帶打窿，日日唔停手，做咗一個月就覺得頂唔順，實在太悶之後又試過好多唔同嘅工作，做過酒樓侍應：『先生飲咩茶？』，又做過賣衫Sales，接觸過唔同嘅人同事，我好鍾意觀察唔同人嘅面貌。」嘗試過不同工作後，當年只有18歲的袁文傑，膽粗粗報名參加無綫電視第四期藝員訓練班：「畢業之後，無綫當時只簽咗6個人，當然我並唔係其中一個！雖然冇簽約，但好彩好快有其他工作搵我，幫人拍吓MV，影硬照咁，都唔使為經濟擔心。」
阿仙奴忠粉 變音癡
眾所周知，袁文傑是球隊阿仙奴的忠粉，講波更是頭頭是道，甚至自組團隊在網上講波。但原來除了足球外，他對音樂的熱愛程度亦不遑多讓，是「音癡」一名。他手舞足蹈地說：「嗰時完咗藝訓班，除咗拍MV、行Show外，平時就去唱片舖賣CD，雖然淨係得4,000蚊一個月，但因為我有其他收入，所以冇所謂。可以成日不停聽唔同音樂，又可以同其他樂迷傾吓講吓，交流心得，簡直賺晒！」直到現在，袁文傑仍有一個開CD舖的夢想，他說：「依家樂迷聽嘅歌都比較狹窄，可能只係聽流行嗰幾首，其實音樂嘅世界好大，好想話畀多啲人聽，同大家分享。」
CD舖 遇怪客葉家寶
在賣CD的時期，袁文傑還遇上一個特別人物：「嗰時有個客，成日喺就關門時出現，揀隻碟叫我開畀佢聽，如果啱聽就會即買，慢慢我哋就有傾吓偈。點知有一日，我睇電視見到嗰個客出現，仲坐喺電視台高層嘅前排位置，佢就係葉家寶。」袁文傑回想起當年，葉家寶曾笑問他：「有冇興趣嚟亞視玩吓？」雖然最後不了了之，但想不到數年後，輾轉間他真的加入了亞洲電視，成為旗下藝員。
擔正拍劇 咀楊恭如
藝訓班後，袁文傑參加了《第二屆寶麗金卡拉OK模特兒大賽》並贏得冠軍，遇上了他人生中的兩位伯樂：「好多謝唱片公司老闆劉東夫婦，佢哋好照顧我，仲介紹我入亞視，打開咗我嘅演藝之路。」1995年袁文傑加入亞視後，遇上另一位伯樂－劇集監製蕭笙：「好多謝監製蕭笙，當時起用我呢個新人做男主角，你諗吓，同米雪、姜大偉、楊恭如同陳煒一齊拍，係幾咁難得嘅機會。」袁文傑又大讚楊恭如非常有「風度」：「有場戲我要同恭如錫，可能佢見我係新人，所以好照顧我嘅感受，竟然問我：『一陣我要錫你，你介唔介意？』我當然話唔介意」
在亞視，袁文傑更有機會做大騷司儀，發展另一方向：「呢個要多謝前亞視節目監製凌雪娥小姐，係佢突然打畀我，搵我做大騷司儀，令我可以向司儀界發展。」他亦不負所望，2015年贏得《全球粵語主持人大賽》冠軍和「最有台型大獎」。
亞視舊人 齊集大台
2011年，袁文傑離開了工作15年的亞視，先後為NowTV和有線主持節目，又為網台音樂和足球節目任主持，直到2016年簽約無綫。再次簽約電視台，袁文傑直言感安穩：「個心安定咗，入到無綫第一個感覺就係好大，同埋又撞到一啲以前亞視嘅人，雖然只係一小部分，但呢一小部分對我嚟講好有親切感。」回望入行多年，袁文傑一直以隨遇而安的態度面對，他說：「尹天照大哥同我講，其實我依家擁有嘅嘢，都係順應而來，要識感恩，我都好認同，覺得唔使刻意去做任何嘢。有人問我點解唔去應酬？我覺得做好自己就可以，唔使做咁多無謂嘢。」
拍拖6年 唔愛束縛
提起拍拖6年的女友張潔蓮（Jackeline），袁文傑立刻笑得非常甜蜜，大讚女友是個很有耐心兼充滿愛心的人，又讚她天生懂得和小朋友溝通。問到他認為自己有何吸引之處迷倒女友時，他笑笑口說：「梗係外貌啦，哈哈！講笑啫，我都唔知。我又唔浪漫，又唔會有驚喜，可能有安全感，因為我好有交帶。（日日報到？）又唔係報到嘅，我覺得發生咩事都應該講聲。」他又直言未有結婚的確實計劃：「我係一個唔鍾意受束縛嘅人，可能即興結婚！」
場地：名館
鳴謝：Barry@J&B Ent
|
鍾意就快D Share啦！
|
|
|