近年憑精湛廚藝爆紅的71歲藝人李家鼎（鼎爺）最近踩入商界，獲老闆支持在銅鑼灣開設私房菜餐館，主打粵菜。餐館今日舉行開幕儀式，獲不少好友撐場，李家鼎兒子李泳漢與太太以及李泳豪一早到場打點，李家鼎現任女友更帶埋女兒及外孫女撐場。
賓客食到舐舐脷
心情high爆的李家鼎身穿灰色唐裝衫現身，問到昨晚有否開心到瞓唔着？他說：「係根本冇得瞓，要做嘢。（心情有冇緊張？）上星期都緊張呀！擔心啲裝修，因為打風怕趕唔切，多謝老天爺，個風最後打歪咗，本身門口仲有個百子櫃，但未到。（裝修方面有冇參與畀意見？）都有啲，咁老闆要求都高。」他表示昨晚已率先了搞兩圍試菜，招呼30多人，其中一味「古法金邊方脷」食到大家舐舐脷：「未試過！骨都冇埋，條魚成本都2,000蚊，有錢都未必買到，係一早要同漁商傾好。好多嘢我都要親力親為，尋日我早上9點做到夜晚12點，拍劇都冇咁辛苦，拍劇中間可以hea吓，但煮菜要全程金睛火眼孫悟空上身！（幾耐冇假放？）至少兩個月，去到出年二月新年都有人一連包幾晚，多謝大家畀面一圍幾萬蚊，已經有兩枱有人即刻畀咗錢，人哋咁欣賞你，唔可以瞞天過海，自己走咗去，我做唔出！基本上有八成都係我整，因為其他大廚冇我咁全能。（荷包脹晒囉！）哈哈！可以再脹啲，我荷包大過荷葉呀！」
暫時冇計劃結婚
提到工作如此忙碌，另一半有否投訴？李家鼎以「師奶」稱呼對方，並說：「食鹹魚青菜好咩？」他又指即使女友及兩名兒子想來幫襯都要排隊：「個個都要排隊，一視同仁，希望十一、十二月留到一圍、半圍畀佢哋，唔可以自己人就打尖。」問到與另一半是否還未註冊？他笑說：「呢個世代，問心呢頭註冊都可以揾另一個。」
每位收近2千
此外，私房菜開幕菜式有精選前菜四小碟（椰皇酸薑皮蛋、蚵仔卷、蜜汁叉燒、秘製醉鮑魚）、阿爺黃金蠔、乞衣雞、紫晶生炒骨、黃鱔焗飯、椰皇燉軟雞、荷葉龍盤鱔及萬壽果糖水，盛惠每位$1,888。
|
鍾意就快D Share啦！
|
|
|
