一句「你有Freestyle嗎？」成為全國潮語，內地選秀節目《中國有嘻哈》唔單止出咗呢句潮語，仲畀歐陽靖（MC Jin）過足口癮，口水都變黃金！初時人人睇《中》都係為睇評判小鮮肉吳亦凡，點知卻被以學員身份參賽嘅「Hip Hop Man」即係MC Jin搶晒fo！威力仲勁到將Hip Hop風喚醒內地十三億人，個個「嘻哈」上身，就連講句嘢都要押晒韻，真係中國有嘻哈！
鹹魚翻生雖敗「油」榮
Rap咗近廿年嘅MC Jin雖然最終被飛出局，仲被評委彈：「英文太多！」聽到都吹到啤一聲！不過輸人唔輸陣，喺呢個有Like有飯開嘅年代，MC Jin今鋪真係喺內地打響名堂，吸金唔停手，所以唔參加復活賽都冇所謂啦，慳番啖氣去吸金好過！我Nuts哥聽聞佢接騷接到出年年中，一、二千萬人仔落袋冇走雞啦，咁多油水，呢鋪仲唔係雖敗「油」榮咩！
有人話佢自貶身價，以參賽者身份出嚟係為錢跪低，但查實由零開始都好正常，始終佢喺內地冇乜知名度，冇理由一嚟就埋枱做評委㗎，反而做參賽者仲可以大顯身手騷Quali添。不過好笑在係，MC Jin 20歲就已經Rap贏班鬼佬，但吳亦凡當時都只不過係12歲，連毛都未出齊，依家反而做評判去Judge MC Jin，真係未夠班囉！
MC Jin有幾勁？上YouTube睇2002年佢參加大賽，係第一個美籍華人（ABC）連續攞足七星期冠軍，見到牛高馬大嘅鬼佬驚都未驚過，每次對方用中國人呢個point嚟攻擊佢時，佢都會一句車埋去反擊：「你着緊對鞋係made in China 㗎！」當對方寸佢「幼細」似牙籤時，佢諗都唔諗：「係呀！但係你條女成日用嚟撩牙呢！」之後佢出碟仲打入埋美國Billboard二百大，創造華人Hip Hop神話，就連美國前總統奧巴馬當年都搵佢Rap住助選造勢！
寧換尿片唔做「蠟青」
Rap唔係話你唔黐脷筋就得，仲要轉數快，你估七步成詩咩？ MC Jin絕對唔係蠢仔，智商有160！正常人IQ有70至130，高過130已經係資優，美國前總統克林頓都係148，微軟創辦人Bill Gates（蓋茨）直情160！天才如MC Jin，喺美國Yo住嚟香港「ABC係我係我」，但冇人識貨，最後佢直情做埋「退休人士」，去無綫拍劇做主持。喺《潛行狙擊》做配角「立青」冧到大批師奶，攞埋台慶嘅「飛躍進步男藝員」獎，話時話都幾唏噓，佢做歌手時都只係攞過「叱咤十大」嘅第六位，同新城勁爆頒獎禮嘅安慰獎咋！
身為Hip Hop宗師明明好鬼型，但要拍劇招呼班師奶，真係大材小用！唔想繼續做配角墊人底做「蠟青」，MC Jin索性返美國陪老婆生仔，餵奶換尿片閉關，一去就去咗五年，五年磨一劍，終於畀佢成功上位！做人如果冇夢想，同條鹹魚有咩分別？MC Jin今鋪由鹹魚跳到上大枱，仲可以海鮮價開騷搞巡迴，不過我Nuts哥知佢爆紅後一樣咁慳家，篤串魚蛋就一餐，就算佢出戰嘅面具，都係幾廿蚊買番嚟再加工。佢話錢係賺唔盡，陪住囝囝成長先最重要，只要心中有Hip Hop，手中無劍，心中有劍，呢啲咪宗師囉！
|
鍾意就快D Share啦！
|
|
|
