麥明詩(Louisa)噚日突然去澳門為四太率領嘅「澳門發展新連盟」站台拉票，麥明詩否認撐建制派，話只係撐好朋友何猷亨。
其實麥明詩同猷亨算係識於微時，當時麥明詩仲未選港姐冠軍前，喺英國讀書已經認識猷亨；四太亦好欣賞麥明詩，知佢讀書叻，就搵咗Louisa幫細女超欣補習。四太仲喺台上爆料，話好想Louisa同猷亨拍拖，四太話﹕「嗰時佢哋十六、七歲，見到阿詩，覺得呢個女仔幾好。點知阿詩之後拍咗拖（指林作），就同阿亨講話佢走寶。」
猷亨就借麥明詩同林作戀情搞氣氛：「我老死(指林作)愛我，多過愛佢，我哋感情十幾年。你今日咁啱路過，支持吓我哋好唔好呀。」之後，麥明詩唱《我願意》，台下有人起哄，猷亨就話：「係我願意投你一票。」麥明詩就笑笑口：「我願意支持四太，你阿媽。」
對於麥明詩被指撐建制派，何猷亨今日回覆《蘋果》代好友解話﹕「今日我哋搞選舉活動，大家係一場朋友，朋友嚟撐我，唔係講政治。咁啱好多英國讀書嘅朋友嚟玩，大家嚟探我班。」而四太就繼續讚麥明詩，四太話﹕「佢哋成班朋友嚟咗澳門玩，嚟捧阿亨場，我見到佢，梗係要捉佢上台，呢個小女孩，係我個仔朋友仔，我識佢嗰時都未做香港小姐，佢讀緊劍橋，幫欣欣(超欣)補習，已好欣賞佢，佢讀書好叻，話晒十優，佢講嘢好叻，欣欣考到間好大學，都好多謝佢，佢係一個好榜樣。」
問到點解今年搵埋猷亨一齊參加選舉，四太話：「依家要關心多啲青年問題，佢對青年會瞭解多啲，唔係淨係佢，我哋團隊有青年教師、文創，同佢都o係澳門做咗幾年嘢，知道年青人須求，住屋、教育，同專注澳門博彩業。」
|
鍾意就快D Share啦！
|
|
|
