71歲藝人李家鼎憑節目《阿爺廚房》讓大家見識到其廚藝，最近他投資逾百萬、再獲老闆支持，在銅鑼灣開設樓上私房菜餐館，主打粵式功夫菜，昨晚（3日）正式開業，現場七圍枱全滿，食客晚上七時多入席，因開業首日關係，餐館特別打通VIP房，讓全場逾80名食客都可隔住玻璃看到廚房情況，齊齊見證李家鼎的巧手！席間有食客愈食愈興奮，紛紛圍住玻璃舉機影相，更有食客玩住Live，跟網友分享喜悅。心情靚爆的李家鼎亦多次親自出來招呼食客及介紹菜式，有人要求合照，他都來者不拒。
絕密菜色曝光
開張首晚菜式有「鼎爺精選前菜」（椰皇酸薑皮蛋、懷舊蜜汁叉燒、炸腐皮鮮蝦火鴨絲沙葛、秘製鮮鮑魚）、「花膠去骨鵝掌燴柚子皮」、「雞油花雕紅蟹陳村粉」、「紫晶生炒骨」、「阿爺乞兒雞」、「古法荷葉蒸方脷」、「黃鱔焗飯」及「金銀玻璃肉」。
「全部係功夫菜」
他接受東網訪問時直言壓力很大，因要對得住自己及食客，預計幾個月冇得放假：「依家都有啲攰，真係病都冇時間，但應承咗就要有口齒，亦都戥員工辛苦，朝朝五點去指定地方搵食材，唔係咁簡單。」價格方面，VIP房最低消費是每圍二萬元、每人$1,888，另外其他級數價錢為4人枱最低消費$4,000、8至10人枱$8,000至$10,000，14至16人枱$14,000等，李家鼎笑言定價係平咗：「全部係功夫菜，時間都要錢有啲餸要整幾日！但公司想推廣粵菜，唔想收太貴，自己都有投資七位數，冇諗幾時回本，最緊要開心！錢係第二、口碑第一！」
功夫菜逐味睇
李家鼎表示每款都是功夫菜：「出面好少人做，因為材料貴，整嘅時間又耐，又唔易買靚料。」他特別推介以下幾款菜式，並逐一談論有幾唔易整：
【花膠去骨鵝掌燴柚子皮】「我會親手去鵝掌骨，連細骨都拆埋，花膠要煨幾日，碌柚皮要燒完再浸水再揸水，如果有苦澀味要再浸兩日，味餸準備都要4、5日！如果是但一個材料唔合格就唔要，又要再整過！」
【雞油花雕紅蟹陳村粉】「花蟹要重一斤至斤半之間，煮嘅過程要Keep到蟹鮮味，陳村粉嘅爽口，酒嘅香，雞油先後要落兩次令味餸更香！」
【古法荷葉蒸方脷】「金邊方脷最好用野生，特別香、特別腍，一條方脷成本價已經二千蚊，一定要夠斤両，所以要提早跟漁商拎，可能唔係晚晚有。」
|
鍾意就快D Share啦！
|
|
|
