70年代唱而優質演的陳秋霞去年患上乳腺癌第二期，身在吉隆坡的她接受東網長途電話詳述病情，秋霞說：「我係乳腺癌第二期，左邊乳房，最好彩冇擴散到淋巴，但睇到照出嚟好惡（指腫瘤）。」早前她為新書《因緣‧音緣》舉行分享會，亦有講述她的抗癌過程，她說：「做完講座，我身邊有三個朋友都發現身體唔同嘅部位有唔妥，都係好嘅警愓性，佢哋發現得早。」她提醒大家不要諱疾忌醫，她說：「咩年代，我做過明星有咩大不了，唔好怕醜，平時要照顧同小心自己身體。」
唔考慮重建乳房
秋霞透露她的腫瘤有3.7cm x 2點幾cm大，是自己忽略了，她希望能夠通過訊息，給大家一個警覺都是一件好事，她已成功切除左邊乳房及腫瘤，對於保不住乳房，她笑說：「唔保啦，60歲仲保乜鬼。（你唔貪靚？）我係全世界最唔貪靚嘅明星。」秋霞亦沒考慮重建乳房，她說：「諗住唔做啦，順其自然，咁嘅年紀冇乜所謂，都成頭白髮。」雖然開刀傷口大，但她說：「咁隱蔽，又唔係成日去游水，我完全唔介意，都慣咗幾個月。」記者打趣笑她身材好，如今是否沒有了好重負荷？她哈哈大笑：「冇、冇、冇，我不嬲都嗰類型，其實重唔重建對我嚟講冇乜大分別。」
冇為呢個病流淚
秋霞的姨甥女鄺靄慧亦是其主診醫生，鄺靄慧是香港遺傳性乳癌家族資料庫創辦人，秋霞笑說：「喺確診嗰一刻，我第一句話係同佢講：『今次我唔做你代言人都唔得』我仲喺度講笑，我出奇樂觀同自己講，唔會為呢個病流一滴眼淚，我冇喊過，只係瞓喺手術枱驚咗一下，我嗰陣我心裏面唱歌。」她覺得有病就醫，對醫生的信任也非常重要。雖然秋霞有病，但她的家人及三個女兒都好樂觀，她說：「我啲屋企人都冇喊，係我家姐見到我做化療時，因為甩頭髮，成個枕頭都係頭髮，佢就喊。」當她進行化療的三個女兒輪流到醫院陪她，問她可有想過「死亡」為家人作出打算？她坦白說：「我早早就搞掂晒，我好好笑喺2007年已經立咗遺囑，嗰時我去西藏做義工，因為仲未有咁多人去，唔知會唔會有高山症，有乜差池，因為聽人講愈後生愈危險，唔理三七廿一叫律師嚟搞掂晒，冇後顧之憂，自己嘅心態就有幾耐得幾耐，冇特別去計算。」
邊做手術邊敷面膜
秋霞又爆做手術當日是自行步入手術室，手術前、後曾與醫生、麻醉師等自拍，接受長達三個多小時的手術時，因為在手術內比較乾燥，她更敷上透明面膜，她笑說：「唔好嘥，我仲搽埋Hand Cream（潤手霜）。」她坦言最擔心是乳腺癌細胞遺傳給三個女兒，所以手術後第一時間驗血做了遺傳基因檢查：「最好消息係我呢啲癌症基因冇遺傳到畀佢哋。」談到化療過程，她坦言沒想像中痛苦：「因為我啲癌細胞惡啲，本來可以攤長打，但我喺四個月打晒，又過晒關。我冇嘔過，但條脷係苦，面又爆瘡，手腳、指甲又有黑斑，好彩依家又退番。」她表示往後10年都要服藥抑制癌細胞，有感今次是一個警惕，並呼籲大家要注意健康。
|
鍾意就快D Share啦！
|
|
|
