劉永，唔經唔覺已經66歲；喺觀眾眼中，大部份人都會諗起佢演秦始皇，再嚟句主題曲「大地在我腳下」（註：係羅家良唱嘅），有聲有畫面。
於1971年入行，由小生做到老生，喺鏡頭前嘅劉永，已經66歲，風采未隨歲月沖走。
再聯想到嘅，應該會係佢前妻黎燕珊，加上咁橋呢排呢對過氣夫妻輪流上娛樂牌，隔空「交流」，令呢兩個名近排又變熱門字。
1992年，劉永娶到亞姐黎燕珊，婚後育有一子一女，可惜兩人婚姻維持到8年又告分開，有傳當年女方被男方家暴，導致離婚，黎燕珊開過記招澄清，後來黎燕珊向法庭申請「人身保護令」，阻止劉永接觸一對仔女。
早前喺觀塘接受《蘋果》訪問講近況嘅劉永話：「都有打俾阿珊，經常都有同兩個小朋友聯絡。」
而劉永嘅前妻，其實仲有一個，就係佢首任妻子、台灣女星戴良純。
劉永喺1981年認識戴良純，3年後兩人秘密結婚，但婚姻只係維持咗14個月，1984年戴良純提出離婚，劉永以菜刀斬傷對方，被判兩年半有期徒刑，仲要賠償戴良純600幾萬台幣，折合當時大概160餘萬港元（新聞連結： http://bit.ly/2fhuJa1 ）。劉永提出上訴，更在上訴期間潛逃返港。劉永喺台灣被通緝期間，其電影曾在當地被禁止上映。
劉永參演嘅戲喺台灣受到了禁制，不過最後佢選擇偷渡返香港，問到呢件往事，佢話：「已經冇事啦，早幾年我都有返台灣。喺內地由頭做起唔緊要，做人唔會事事順利，人生低落最緊要自己放得開、睇得開，喺內地我哋係『老牌新人』，好多人唔識你，唔識你可以點？『你以前做過主角咩？係咩？』邊個知？咪由頭做起囉。」
話晒紅過、風光過，但返到大陸發展要由新人做起，豈非屈就？但，原來劉永覺得係焉知非福，佢喺大陸遇到第三春，婚後育有兩名兒子，分別6歲同10歲，一提起屋企，劉永話：「男人最開心係有一個家，返到屋企叫你一聲爸爸，幾辛苦都唔記得。太太比我細30歲，返到屋企會有一種歸屬感。」
講到呢段感情，劉永笑言冇話特別去搵，亦唔似年輕人咁激情，只可以老土啲講係緣份令大家喺埋一齊。劉永喺微博不時貼出佢同囝囝郊遊、游水嘅相，之前嚟香港拍戲，都喺一家四口一齊落嚟香港住酒店。劉永話太太已經攞咗香港身份證，兩個仔喺大陸住，但喺香港讀書，佢話：「太太喺香港嘞，兩個仔坐校車好方便，車到門口送返學。」講到兩個仔，劉永一臉慈父本色話囝囝都有拍吓網劇，佢話：「我覺得唔影響學業，玩吓都冇所謂。至於大個之後就唔會理，亦都理唔到。因為兩個仔慢慢大會有自己思想，想要乜、想做乜，都唔到自己安排，做老竇嘅喺後面支持同鼓勵。」
| （左圖攝影：葉君海） | | |
| | | |
| | |
|
鍾意就快D Share啦！
|
|
|
