昨夜凌晨1時42分，《蘋果》記者突然接到洪朝豐來電，心中忽然一寒，事緣過去10多年來，洪朝豐多次深夜來電，也巧合地遇着佢抑鬱躁狂症發作，但今次，洪朝豐 ...
昨夜凌晨1時42分，《蘋果》記者突然接到洪朝豐來電，心中忽然一寒，事緣過去10多年來，洪朝豐多次深夜來電，也巧合地遇着佢抑鬱躁狂症發作，但今次，洪朝豐思路清晰，佢好冷靜好細聲咁話：「我可能患脷癌，可能要做手術，我有件事好想做，就係返電台開咪做節目。」
【再病變落去就第三期，即係癌症】
於是乎，噚日中午，記者去咗佢從未招待過傳媒入內嘅藍田公屋寓所詳談。精神唔錯但聲線有啲沙沙地嘅佢話：「我條脷病咗，病咗超過一年，開始嘅時候唔係好為意，有少少痛，睇醫生、搽啲藥。有時好啲唔痛，dum吓dum吓成年之後覺得奇怪，發炎嘅話，冇理由條脷發炎成年。」
「後尾借住一次返去精神科醫生度覆診，同精神科醫生講，同埋俾佢睇條脷底，主要喺左邊嘅脷底，佢就即刻介紹我去睇耳鼻喉科。醫生好仔細幫我睇，建議我做一次切片檢查，透過小手術將發炎嘅組織攞出嚟，睇吓細胞病變係乜嘢嘢。
洪朝豐稱，「根據佢哋講，好嘅細胞會因為某啲原因變成壞嘅細胞，壞嘅細胞變落去，就會變成癌細胞。咁第一次檢查報告出嚟，係細胞病變嘅第二期，如果再病變落去就第三期，即係癌症。」雖然洪朝豐聲線有點沙，但說話流暢，脷底發炎未有影響他的說話能力。
【傷口重重覆蓋「黃色嘅膿」】
兩個月前，洪朝豐做第一次切片檢查，出嚟結果係冇癌細胞，但之後條脷傷口突然變壞，上周四（28號）要再做第二次切片檢查。
洪朝豐稱：「最初醫生同我講，第一次手術之後，埋口埋得好，但冇幾耐個傷口又重新覆蓋住啲黃色嘅膿，似乎手術後炎症蔓延得更加兇更加狠，所以醫生建議做第二次切片手術，16號就會出報告，睇吓細胞病變去到邊個地步。」
洪朝豐讓記者看過脷底，約1毫子面積大小含膿，洪朝豐稱還有一條約1吋長的面積、脷底黐住牙肉的位置發炎含膿，被醫生切走化驗。光是聽他憶述已經覺得痛。
「我o依家啱啱做咗個小手術，傷口會痛，吞口水會痛，講嘢會痛，食嘢會痛，唱歌會痛，喺生活各方面，提醒住你條脷係出咗事。尤其是食嘢方面嗰種感覺從來未有過，你一邊忍住痛，一邊享受食物嘅美味，嗰種感覺好似好壯烈。」
【做最壞打算，同個仔講咗葬禮要點做】
自己有冇作最壞打算？洪朝豐稱：「有㗎！」然後深深吸一口氣說：「唉……因為如果發展落去係癌病嘅話，可能係初期，可能係……唔知啦，我仲要做一啲化驗，仲要睇醫生嘅檢查，但我做嘢從來都係做最壞打算，當然我面對呢個病時，我會積極去組織我嘅醫療體系，要設計到好仔細、好全面，同時間鬥快。我做最壞打算，係同我個仔講咗我葬禮要點做。」
採訪：魯吉
拍片：廖達燊
攝影：仇志德
