老生常談落飛黨無孔不入，賭大錢不分場地同日夜。好似今午（29日）跑谷草日馬咁，佢哋第三場五班1200米賭重高伯新馬房「勝利公爵」，結果順利收大錢，須知此駒在炒飯哥羅理雅胯下後上一擊即中，開出79.5元啡燈Win，組合獨贏A3則派27.5元。
「勝利公爵」馬主共同理想團體成員，包括歌手許廷鏗的兄弟許永鏗及老竇許義鏞等，過去此駒許廷鏗亦有到場為這匹愛駒打氣。「勝利公爵」跑到六歲，一向出賽唔多，過往11戰一亞兩季冇贏過，當中上季五戰全跑十名以外，表現相當不濟。
但「勝利公爵」呢次新季初出首配羅理雅，6檔起步沿途於內欄慳位跑，末段沿欄直上衝過晒所有前面馬匹，並力拒從外叠如飛殺上的大熱門「敬無極」，險勝頸位，就此打開服役勝利之門，落飛黨在Win彩池獲利約1,000萬。許義鏞等人有到場拉頭馬，但就未見許廷鏗。
羅理雅前晚（27日）於澳洲祖家客串，出戰滿利谷馬場夜賽，結果無功而還，今場在谷草贏馬補數，亦延續個人近期本地賽強勢，至於高伯新從中亦打破逾一個月頭馬荒。
第三場繼續熱門天下，二、三名「敬無極」及「勁駿皇駒」分別係大熱及次熱，第四名由較冷的「神寳金剛」取得，四重彩派二萬五千幾。
| 許義鏞(左二) | | |
來源 source: http://hk.apple.nextmedia.com
|
鍾意就快D Share啦！
|
|
|
