林俊賢與黃子揚當年因為爭女而反目。
娛頭
引爆廿年秘密 好友反目變襟兄弟 黃子揚幫林俊賢養仔 14年
在電影中經常做反派，被封娛圈十大惡人的黃子揚九月被爆再婚，與比他細二十年大陸經理人入紙註冊，但原來這個新老婆並非第二春，係第三春至真！
據知，年過半百的黃子揚，其實一直收埋了十多年的第二任老婆 Winnie，想當年惠英紅都是她手下敗將，而這個 Winnie亦嫁過俾八十年代靚仔小生林俊賢，更在二○○○年生咗個仔。
黃子揚同林俊賢這對襟兄弟從此反目，之後黃子揚更接收了 Winnie與她的囝囝，甘願做林俊賢兒子後父多年，視如己出，而這個秘密埋藏多年，終於被爆出！
再婚娶嫩妻
近日有報導指黃子揚與內地演員李倩入紙再婚，據知該位李倩並不是演員，而是與黃子揚出雙入對的經理人 BoBo，而且 BoBo不時在微博上高調放二人親密合照，令黃子揚身邊朋友均知道二人是情侶關係，最近 BoBo更自作主張 post婚照上微博公告天下，點知觸怒黃子揚並要未婚妻即時刪 post，結婚結得相當低調。
「其實兩年前，已經知道佢哋拍拖，個女仔成日好張揚喺公開場合繑住子揚，反而子揚相當避忌，真係無諗過佢哋咁快結婚囉！」黃子揚身邊好友透露。
惠英紅人生污點
黃子揚情史多籮籮，女友如走馬燈，八八年搭上開心少女組陳加玲，八九年同惠英紅發展三年情，最後惠英紅與黃子揚反面分手收場，更直指他生活不檢點，同時間有四個女人，當中包括有女星陳寶蓮，當時惠英紅表示有第三者約她講數，她對小三說：「你攞去用吧，多謝幫忙，唔使客氣。」之後每逢有人再向惠英紅問起，她都唔願再提，同埋只諗起四個字——劫財劫色，仲話這個人是她人生最大污點。
九八年黃子揚與第一任妻子 Tina結婚，但婚姻維持了兩年，二○○○年黃子揚與 Tina離婚，據知是因為黃子揚想翻撻舊女友 Winnie，而這位 Winnie原來大有來頭，是保險公司區域總監，團隊有過百人，年薪過百萬，並與不少圈中人稔熟，兩人拍拖多年，於一一年在關島結婚，但他們婚姻都只維持了五年，在一六年離婚。
複雜關係
黃子揚這位隱形前妻 Winnie，原來早在八十年代已經同過黃子揚一齊，當時更與惠英紅爭過仔，而惠英紅所講黃子揚同時有四個女人， Winnie原來就是其中一人，其餘兩人就是陳加玲及陳寶蓮，當時 Winnie雖然贏得黃子揚歡心，但兩人離合多次，而最複雜是他們當中，又有第三者介入，就是當年的靚仔小生林俊賢。
「子揚以前成日帶 Winnie落 97蒲，嗰陣仲有歐陽震華、陶大宇同林俊賢等人，人人都知道佢哋嘅關係，點知後尾子揚忽然同咗外籍女友 Tina結婚，激到 Winnie好嬲，咁啱嗰段時間林俊賢同第一任老婆離咗婚，又對 Winnie狂追，終於 Winnie同咗林俊賢一齊，但係本身子揚同林俊賢又係兄弟好 friend，因為呢件事佢兩兄弟反晒面。俾個兄弟撬牆腳，子揚點會唔嬲？當年子揚仲試過喺全部朋友面前話要打林俊賢，好彩大家當場制止！」黃子揚身邊人透露。
當年 Winnie因為對黃子揚怒氣未消，更為啖氣與林俊賢在二○○○年生了一個仔，此舉令到黃子揚怒火中燒，同年他飛甩外籍妻子 Tina，要在林俊賢手上搶回 Winnie，而剛啱○二年林俊賢輸股票搞到破產， Winnie最終決定同番黃子揚一齊。
稱職後父
黃子揚同 Winnie復合，更不計前嫌，做埋林俊賢兒子後父，多年來盡父親責任，盡心盡力，照顧林俊賢兒子。「個仔嘅親生老豆雖然係林俊賢，但就當正黃子揚係爸爸，子揚仲好踴躍出席阿仔學校親子會活動，仲成日帶埋 Winnie同個仔一齊返教會，個個都以為佢哋係一家三口！」知情人士透露。
本週一（十月九日），本刊向現為保險公司區域總監 Winnie求證，當日 Winnie收工後，會合囝囝繑實在銅鑼灣行街，當 Winnie準備揸車離開前，記者就她前夫黃子揚再婚及當後父一事求證。
記：黃子揚最近再婚，你係佢前任太太會唔會祝福佢？
Winnie：我都係上網睇到話佢預備結婚，咁我都有恭喜佢嘅！
記：點解之前一直咁低調？係有咩苦衷？佢當年喺林俊賢手上搶你返嚟所以先咁低調？
Winnie：我覺得唔係好需要答你條問題！
記：林俊賢當年同你生咗個仔，你哋嗰時有冇結婚？
Winnie：我都覺得唔係好方便交代，或者你問番林俊賢。
記：你當年係因為林俊賢破產所以帶埋個仔離開？
Winnie：都係嘅！但唔係唯一一個原因，有其他原因嘅！
記：係咪因為當時子揚追番你？
Winnie：都唔係，我係同林俊賢分開咗先同番佢一齊！
記：子揚一直做緊後父？
Winnie：都係，佢係好盡爸爸嘅責任，呢方面可以俾番一個讚佢。
記：你同子揚之後有結婚？
Winnie：都係！
記：你哋搞清楚離婚關係未？
Winnie：離咗，佢入咗紙我哋當然離咗，手續清楚佢先會入紙！
記：同子揚仲有聯絡？
Winnie：都有，朋友關係！
記：當年林俊賢同個女相認你有冇份幫手？
Winnie：都係嘅，我當年都有喺 Facebook幫手搵 Denice出嚟。
曾經係小生
已經五十六歲的 80年代前無綫小生林俊賢，憑住在 TVB《男兒本色》一劇成名，其後主演多套無綫劇集包括《豪情》、《名門》、《上海大風暴》等，大受觀眾好評。直至 93年，林俊賢離開無綫，轉到內地及台灣發展，憑《唐太宗李世民》紅遍兩岸三地，令他事業走向頂峰， 96年林俊賢退出娛樂圈並從商，生意涉及投資、有機農業食品及影視製作。在娛樂圈消失近二十年， 13年復出拍戲，早前更參演 Juno執導電影《風林火山》。
林俊賢曾經歷兩段婚姻，並育有一女一子，現年二十二歲女兒林鈺洧，前年以星二代姿態入行做模特兒。
十大惡人
剛踏入 50歲的黃子揚， 80年代參加無綫舉辦的《銀河接力大賽》奪冠入行，身形高大的黃子揚，天生一副奸樣，從影三十年以來飾演無數反派角色，曾拍過多部電影，包括《再起風雲》、《我在黑社會的日子》等，其中在《逃學威龍》中飾演張敏男友「黃 sir」最為經典。
88年，黃子揚曾與大自己七年的影后惠英紅發生姊弟戀，可惜只維持三年多就玩完，有傳陳寶蓮介入，惠英紅以「劫財劫色」來形容，這段情是她最大的污點，其後再與女歌手蔡立兒拍拖，之後與一名外籍女友 Tina結婚， 98年他們在家中嘈交， Tina更在家開煤氣企圖自殺。近年黃子揚轉到內地發展。
錯綜複雜
1989年 黃子揚與在美國讀書的 Winnie拍拖
1994-1997年 林俊賢同外籍第一任妻子結婚
1994年 12月 5日 同外籍第一任妻子生咗個女 Denice
1997年 林俊賢同第一任妻子離婚
2000-2002年 Winnie同林俊賢結婚——其實無結婚（報導一路所講的第二任妻子）
2000年 林俊賢同 Winnie生咗個仔
2000年 林俊賢同 Winnie生咗個仔，激怒黃子揚，隨即同第一任外籍妻子離婚，追番 Winnie。
2002-2012年 黃子揚一路做林俊賢兒子後父
2011年 黃子揚同 Winnie結婚
2017年 9月 13日 黃子揚同年輕 20年的現任經理人入紙結婚
撰文、攝影、攝錄：娛樂組
|
鍾意就快D Share啦！
|
|
|
