Heidi@SG爭仔敗走屈到情緒病
組合Super Girls成員Heidi與Yanny於5月時被本報獨家踢爆因爭仔令姊妹情決裂，失戀後敗走台灣拍電影一個月的Heidi昨日自爆壓力大屈到情緒病，與經理人商量後決定尋求精神科醫生協助。Yanny則以勝利者姿態暗寸對方承受不起壓力：「有壓力先有進步，我喺泰國拍戲都唔開心，返到香港有身邊人陪好快冇事。」
Super Girls（SG）出道時姊妹情深，可惜近年屢傳不和甚至傳出有意「解體」，本報早前踢爆成員Heidi與Yanny爭「有米監製」陳考威搞到反目，縱然事後兩人出席活動時「交足戲」攬攬，但Heidi卻用身「得」住對方。成功與陳考威發展的Yanny多次被捕獲拍拖睇騷和撐枱腳，直至9月尾，陳考威更在社交網上載兩人合照，正式確認Yanny的正印身份，反觀爭仔失敗的Heidi心如死灰，惟有寄情工作，敗走台灣另謀發展，情傷未愈的她上月飛到台灣拍攝電影一個月，更即刻屈到病！
「好多朋友搵唔到我」
SG昨日以黑紅Look出席apm舉行的活動，Heidi受訪時自爆首次做女主角令壓力爆煲：「好大壓力，角色同自己本身好唔同，開始覺得情緒有問題，好似有好多嘢屈喺個心度。」隨即透露在台灣一個月慘變「自閉女」，她說：「喺台灣嗰1個月好多朋友搵唔到我，係因為我唔想理佢哋，不停收埋自己，平時嘅我唔係咁，返到香港都有同經理人傾偈。（有冇諗過睇精神科醫生？）會，經理人會帶我去睇。」記者笑她首次做女主角就有情緒問題，Heidi說：「自己畀自己好大期望，想做到最好。」
同場的「勝利者」Yanny聞言竟表示有壓力是好事，暗寸Heidi承受不到壓力，她說：「遇到壓力係好好學習機會，亦會變得進步，之前我喺泰國拍戲都唔開心，情緒怪怪，不過返到香港有身邊人陪好快冇事。」未知是否男友陳考威陪伴在身邊，情緒都快啲好呢？而活動上，Heidi及Yanny未有並排而企，但總算有眼神交流。
Cheronna車廂撩鼻屎
身為Heidi好姊妹的Aka表示會帶對方「食好西」減壓；Cheronna則被問到為何缺席好姊妹陳嘉寶前日舉行的婚前派對？她即扁嘴說：「因為要拍劇。」並承認不時獲男友「夏雨仔」黃奕晨揸車接送，問到有否試過在車廂做出越軌行為？Cheronna即搞笑爆料說：「放屁同撩鼻屎。」
文：音樂組
攝：唐豁莊
|
鍾意就快D Share啦！
|
|
|
