探熱針
信相士搬屋有運行 細細粒月租四萬會景閣
由王祖藍一手捧起的細細粒（陳嘉佳）， 13年以 220磅深水炸彈身形爆出，繼續孭重飛拍《老表 3》，被指去年收收埋埋賺 160萬的她，原來一直篤信風水，早前更照足相士所言，搬入灣仔會景閣豪宅，以四萬元月租四百呎單位，堅信住得豪賺得多。
愈賺愈多
細細粒近日忙於為電視劇《老表 3》宣傳，上週六（十月二十一日），難得唔使開早班，她下午兩點多離開會景閣服務式住宅，揸住一三年生產的 Golf房車直駛電視城開工。
「細細粒一直同屋企人一齊住，佢好信風水，風水師傅早幾年已經叫佢搬去會景閣，雖然比市面租金貴好多，不過佢話細細粒搬入去就會賺到錢，仲要愈賺愈多，所以細細粒冇擔心過，仲寧願俾多啲錢，同媽咪住一個細啲嘅單位，就算依家租金升到四萬幾蚊，佢都冇諗住搬走。」身邊人說。
有王祖藍罩住，細細粒近年以大碼開心果闖出一條路，拍劇和電影外，又跟住王祖藍團隊經常返內地做騷，密密賺人仔。
撐王祖藍出盡力
對於聽從風水師傅之言入住會景閣，細細粒表示確實愈住愈順利，雖然被媽咪投訴買餸唔方便，不過她計過數：「我搬咗去有三年幾四年，當時都係兩萬幾租金，慳咗水、電、煤，仲有廿四小時冷氣唔使錢，我咁怕熱，我計條數，呢度係抵嘅，淨係俾停車場費貴啲。」
近年有機會返內地工作，她大讚老闆夠晒出力：「我同祖藍聯絡好密切，我會同佢講自己嘅要求，好似拍電影又或者綜藝節目，佢都會盡量安排，我同佢提過想拍大陸電影，佢就搵咗套網大俾我，個角色一啲都唔差，幾乎係女主角，月尾就會開機拍。」
至於早前有報導有藝人不滿而陸續離去，細細粒就撐老闆：「老闆比較忙，我相信大家只係溝通上出現問題啫。」
活在當下
開心果細細粒表面開心無憂無慮，但數年前，由上海返港的機程，因遇上氣流，由短短兩小時變為十二小時，她在機上寫了兩封遺書，因此覺悟到要活在當下。身為家中獨女，她一直負擔父母的情緒：「我冇兄弟姊妹，所有親戚喺上海，一直要一個人分擔屋企嘅事，好似父母嘅情緒問題。因為咁樣，我同自己講，要處理好自己嘅情緒，先有能力安撫屋企人。假設每個人都有 70歲以上壽命，即每分每秒都要咁過，又點可以俾自己唔開心，不如諗點樣解決自己嘅唔開心，將唔開心化為開心。」
撰文、攝影、攝錄：娛樂組
|
鍾意就快D Share啦！
|
|
|
