熱爆娛樂: 轉會星夢做一哥　周柏豪延遲生 B計劃 [壹週刊

2017年10月26日星期四

轉會星夢做一哥　周柏豪延遲生 B計劃 [壹週刊 - 1442] __,柏豪,周柏豪,M1,

周柏豪現身深水埗一大廈天台為新劇《再創世紀》開工。

探熱針

轉會星夢做一哥　周柏豪延遲生 B計劃

周柏豪今年約滿合作十年的華納唱片後，旋即以八位數字轉投 TVB New Media，簽埋 TVB旗下的星夢娛樂做「一哥」，升呢做「親生仔」騎住鄭俊弘。在現時播出的《使徒行者 2》中，周柏豪憑着「樂少」一角備受注目，成功「打入屋」成為師奶界新寵，最近除咗宣傳《使徒行者 2》，又要忙住為另一套大台重頭網劇《再創世紀》趕工，工作檔期排到密麻麻，被迫令生 B計劃押後！

延遲生 B計劃

同圈外女友 Stephanie結婚快踏入一周年，但兩公婆為工作都有共識，將生 B計劃延遲。

去年十一月周柏豪和圈外女友結束十年愛情長跑，在布吉秘娶女友 Stephanie，結婚快踏入一周年，柏豪原本婚後會立即進行造人大計，但剛喺年初轉泊新碼頭星夢娛樂的柏豪，眼見自己事業正起飛，唔想放棄大好機會匿埋湊仔，即同老婆商量推遲造人計劃，放多幾年時間專心工作為事業衝刺同搵銀。見老公拍劇、巡唱、搞品牌忙到無時停，老婆亦體諒配合，決定將生 B計劃押後幾年。

「佢老婆講過好想趁後生生 B，不過柏豪就覺得未係時候，始終而家係搏殺期，簽咗新公司之後大把 project等住佢做，而家仲要劇接劇，檔期已經排到去出年年中， Stephanie無奈都要配合，等老公呢幾年儲吓粉奶錢先再諗！」周柏豪身邊人透露。

搏到盡

加盟 TVB後，周柏豪首次主演無綫長劇《使徒行者 2》今個星期播映大結局，劇集於內地騰訊視頻國粵雙語播放量錄得高達十九億。雖然唔算係男一，但劇中樂少鋒一角依然人氣高漲，令柏豪備受注目，更有份唱埋劇集主題曲《天網》。大台為幫柏豪事業推上高峰，唔想俾佢人氣停低，更加會安排他劇接劇。

早前，周柏豪現身深水埗為劇集《再創世紀》拍外景，在陽光暴曬底下，著住長袖衫的柏豪同對手在天台拍攝一場講數戲，柏豪開工完全唔錫身，連吊威吔的鏡頭都堅持親自上陣唔靠替身，吊完威吔轉個頭又要落街拍追逐戲，一向 chok爆的他為了拍攝效果，連自己形象都唔顧搏晒老命在街上狂奔，跑到頭髮飛起兼青筋盡現， chok王形象全毀。每完成一個 shot柏豪都第一時間睇 playback，稍有唔滿意就要求 NG重拍，非常專業！

吊完威吔，周柏豪轉戰大街拍攝一場追逐戲。

一向 chok爆的柏豪懶理自己髮型狂跑。

柏豪堅持親身上陣完成吊威吔鏡頭。

每完成一個 take，周柏豪都緊張睇 playback。

鄧佩儀有腰傷都跑得搏命，柏豪拍完自己戲份都留低監場。

恨攞獎

周柏豪「空降」星夢，取代原本「一哥」許廷鏗同鄭俊弘之位，事業一帆風順，到目前為止他已經接了四部電影及五場內地巡迴演唱會，加上大台將會以洗腦方式安排柏豪唱劇集主題曲狂谷，唔少網民都話等睇柏豪年尾攞《勁歌金曲》最受歡迎男歌手獎，據知柏豪亦以此為目標。

「柏豪團火好勁㗎！佢話唱歌除咗想攞男歌手，終極目標係想攞埋視帝，所以佢同公司講唔介意辛苦，呢幾年放多啲時間喺拍劇度！」周柏豪身邊人說。