單親媽媽吳綺莉（Elaine）與女兒吳卓林近年關係時好時壞，月前卓林輟學離家出走與外籍同性密友Andi同居，剪了一頭剷青短髮的卓林前日在網誌公開「出櫃」並說：「I'm gay！」
身為母親的Elaine接受東網訪問，問到有否察覺卓林自小的性取向？她說：「佢係我一路湊大，以前佢係有同男仔拍過拖。（意外？）又唔算，近呢一年佢成日同呢個人（Andi）玩，出雙入對，我都意識到。（得一個女，會唔會擔心？）唔緊要，無論佢變成點，外形唔緊要，最緊要安全同身體健康，作為父母就好感恩。（你兩個有冇就呢件事傾過？）冇，唔需要佢安全就得，支持同尊重佢。」
會否覺得是因為關心不夠？她說：「呢啲嘢唔關單親家庭事，係性格問題，我自己都係單親家庭，幾歲就好獨立，自己照顧自己，但卓林好需要愛，要人陪，前幾年我返TVB拍劇，半夜返唔到屋企，佢係唔敢自己去廁所，而呢個人出現，24小時喺度講我愛你，佢自然好接受。」
「交租要自己負責」
對於卓林與Andi沒有固定工作和收入，經常頻撲搬家，Elaine表示每個星期給予卓林900元零用錢，夠她用膳及交通：「屋企大門係隨時為佢開。至於佢冇錢交租，都要為自己負責，好似佢最近有返Office工，幫人執相。」要跟女兒分開住，Elaine心情當然鬱悶，但仍要逼自己習慣，平時會畫畫減壓，最近亦靠頌缽抒發情緒：「早晚都做，敲個盆之後發出嘅聲音同共震，會化解身體內嘅不快感覺，心情會開朗番啲。」而公關鄭紹康亦上載與卓林合照，鄭紹康表示由細睇到卓林大，今次專程約她食飯，慰問一番，他說：「佢心情冇受影響，好開朗，餐飯食咗幾個鐘，大家有講有笑，好開心。」據知，卓林同性密友Andi亦在場。
此外，Elaine好友黎淑賢跟她補祝生日，黎淑賢還把照片上載微博，並祝好友開心快樂！
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
